UBONGE NELANGA UMFUNDI OYE PHESHEYA
KUTHINTEKE inhliziyo yomfundi weLANGA wasePort Shepstone ngodaba lomfundi oswele waseMaqhutshani Secondary School KwaNyuswa, othole ithuba lokuya eGermany amasonto amabili kodwa obengenazo izimpahla zokugqoka nomakhulekhukhwini abezowusebenzisa ukuxhumana nomndeni wakhe ngesikhathi ephesheya.
USiyabonga Memela (20), owenza umatikuletsheni kulesi sikole, ILANGA elike labika kabanzi ngosizi lwakhe lokuswela abezokugqoka ngesikhathi eya eGermany, wathola umSamariya olungile, uMnu Nhlakanipho “Magu" Dlamini omthengele okokugqoka.
Ugcine emtholile omthengele umakhalekhukhwini, okunguNkz Zola Sikrweqe.
Ekhuluma neLANGA uNkz Sikrweqe, uthi lolu daba lukaSiyabonga lumthinte kakhulu ngoba ubona ukuhlakanipha okuyisimanga kuye nokukhuthalela imfundo ngoba ukuba ubengakhuthele, ubengeke alithole leli thuba.
“Ngokusiza umuntu onjengaye, ngibone ngingalahli kodwa ngitshala imbewu ezoqhuma kusasa ngoba naye uzokwazi ukusiza abanye. Indlela abejabule ngayo, ingithintile ebonga lesi sipho, ngibonile ukuthi le nto engiyenzile izohlala enhliziyweni yakhe futhi naye uzoyenza kwabanye uma esephumelele,” kusho uNkz Sikrweqe.
USiyabonga uze athole lolu hambo nje, unqobe umncintiswano wezikole emuva kokuba abafundi benikwe umsebenzi wokuba benze okuthile ngoMnu Nelson Mandela.
Kulo mncintiswano isikole sakhe kasiwinanga kodwa yena uhlabe umxhwele amajaji, wakhala wemuka nomklomelo we-Outstanding Perfomance okuyiwo omyise phesheya.
Ekhuluma naleli phephandaba ngaphambi kokuba alifulathele elakuleli ngoLwesine olwedlule, ubonge kakhulu kubo bonke abenze uhambo lwakhe lwaba yimpumelelo, kubalwa nalo ILANGA ngokubhala udaba.
“Ngibona ukubonga ngomlomo kungenele indlela eningisize ngayo. Ngibonga kakhulu kuNkz Sikrweqe, uMnu Dlamini nakuNkz Jabu Nzama, induna yakwaMayinga, ongiphe umphako kaR300. Inkosi inibusise,” kusho uSiyabonga.