Imeya income abenze kahle
Bekuklonyeliswa abafundi baseSiphosethu
UBUSEZINGENI eliphezulu umcimbi wokuklonyeliswa kwabafundi baseSiphosethu Primary School, eNtuzuma, ngokwenza kahle ezifundweni njengoba ubuhanjelwe nayiMeya yeTheku, uNkk Zandile Gumede, ngeledlule.
Imeya ishiye phansi yonke imisebenzi yayo yanikela eSiphosethu iyokhuthaza othisha nabafundi ba- kulesi sikole esigcina kwaGrade 7.
Lesi sikole, ebesiklomelisa abafundi abawu-30 ngezitifiketi nezindebe ngenxa yokwenza kahle ezifundweni zabo, singesinye sezingene ohlelweni iWorldwide Learning Academy oluqhutshwa yiBelgium.
Kulolu hlelo kuqeqeshwa abafundi bamabanga aphansi kwezobuchwepheshe nasezilimini. Ngonyaka ozayo kunabafundi abazoqokwa ukuya phesheya kwezilwa- ndle ngalolu hlelo.
Ngaphandle kokwenza kahle kwezemfundo, lesi sikole sidle ubhedu emncintiswaneni wokusina indlamu, siya emzuliswaneni wesifunda.
UNkk Gumede, obephuphuma yinjabulo, uthe: “Ngishiye konke obekumele ngikwenze namuhla ngathi mangizohalalisa kanye nani. Siwumkhandlu weTheku sikhuthaza izikole, ikakhulukazi ezamabanga aphansi, ukuba ziqe- qeshe abantwana bethu njengoba isizulu sisho sithi inkunzi isematholeni futhi libunjwa liseva.
“Ukukhalipha kwengane isesemabangeni aphansi yikho okuzoqeda ukungenzi kahle kwabafundi bethu uma sebefika kwaGrade 12. Kangingabazi ukuthi ngaleli giya lesi sikole esihamba ngalo, izingane eziphekwe lapha zizodlula kalula kumatikuletsheni.”
Ithe iyaziqhenya ngomsebenzi omuhle walesi sikole yathi sen- gathi nezinye izikole zingathatha isibonelo esihle, othisha bazo benze umsebenzi wabo ngokuzimisela, bazi ukuthi ikusasa lezinga-ne lisezandleni zabo.
Ibonge uthishanhloko waseSiphosethu, uMnu Themba Sokhabase, nothisha bakhe.
UMnu Sokhabase uncome othisha asebenzisana nabo wabonga nokuhlonishwa yimeya nabazali.
Kulo mcimbi kunandise iqembu lesicathamiya, iKholwa Brothers.