Amadoda angadidiswa wukuzimela kwabesifazane
NGOKWESINTU, indoda iyindoda ngokunakekela umuzi wayo nazo zonke izidingo zawo. Ngisho nenkolo ngokwahlukana kwayo, ivumelana ngokuthi indoda iyinhloko yekhaya futhi yiyona eyenza isiqiniseko sokuthi umndeni wayo uvikelekile, uyondliwa futhi uzithola zonke izidingo.
Nasemandulo nje, inkosikazi ibihlala ekhaya ikhulise izingane ngesikhathi indoda yona iyosebenza yenzela ukuba ihlinzeke umndeni wayo ngazo zonke izidingo zasekhaya.
Ngokushintsha kwesikhathi, abesifazane bangene bathi shi emfundweni ebanike ngisho amalungelo okuyosebenza, balekelele abayeni babo, kodwa lokho kakuwashintshi amadoda ukuba asuke endaweni indalo ewabeke kuyona yokuba yizinhloko nabanakekeli bemindeni.
Amadoda amaningi asemandulo abelesaba ihlazo lokuba kuthiwe kawayondli ngokwanele imindeni yawo. Abekuqonda ukuthi kuyihlazo elesabekayo ukwehlulwa wumndeni, abengamane ayocela ukusiselwa imfuyo yomnumzane ocaphuna kusale ukuze afihle ihlazo lawo, nawo abe nesibaya noma ngabe sinemfuyo embalwa.
Indoda ibingayifuni into eye- hlisa isithunzi sayo neyenza ibe nokwedeleleka nje ibukeke ingendoda yalutho, kunalokho ibizama noma yini ezokwenza ukuba igweme ukululazeka.
Kuyaphawuleka ukuthi zishintshile izinto ngesikhathi abesifazane sebevuka beyosebenza lapho beqashwe khona noma emabhizinisini abo. Babonakala sebeqala ukwenza izinto emizini yabo abebengakwazi ukuzenza kahle ngesikhathi besakhangeza kubayeni babo.
Kubukeka sengathi lokhu kuzimela kwabesifazane kubadidisile abesilisa, bagcina bekhohlwa yindawo yabo yokuba ngabanakekeli bemindeni yabo.
Kubona kuba sengathi kufanele nabesifazane bathathe le ndawo yabo kanti qha, bangabasizi nje kuphela.
Ngibona sengathi amadoda adidekile asuka endaweni yawo aze agcina esebona sengathi kulungile ukuncika ngomuntu wesifazane kukhona konke.
Ngokwendalo, indoda kumele ithande umkayo nomndeni wayo bese umkayo ayithobele nabantwana bayihloniphe. Uma ike yasuka kule ndawo yayo ngokuba ibe ngumvikeli nomnakekeli wekhaya layo, kuba nzima ukuba ithole inhlonipho elindelekile kubantwana kanjalo nokuthobeka kumkayo.
Ngibona sengathi kubalulekile ukuba obaba bangayilibali indawo yabo futhi nothando lwabo lomndeni nomkabo bangalufihli ukuze nabo bahlale behloniphekile futhi bethotshelwa njengoba kulindelekile.
Makungabi sengathi umama uneqembu lakhe lezingane, ubaba yena usele yedwa kanti wukwenza kwakhe kwesinye isikhathi okumlahlekisela ngenhlonipho nentobeko. Makhosi Ndleleni uMaZulu wakwaZondo Insika, UThisha-nhloko waseMatatane Secondary School. mthiyanesgs@ yahoo.com Utholakala ku: 082 752 7342.