Kumele elakuleli lisike iphethini eMelika
KULIQINISO ukuthi ziningi izinto ezingahambi kahle e-United States of America (USA), kodwa futhi kuningi okuhle okwenzeka kuleliya lizwe elinothe kunawo wonke emhlabeni.
Okunye okuhle ngalo, ngabantu bakhona abacabanga ngokukhululekile; kabavoteli umuntu noma iqembu noma ngabe selinhlanhlatha, liphuma endleleni. Singabantu baseNingizimu Afrika, singafunda lukhulu kubavoti bakhona, abangavoti nje ngokuthanda umlando weqembu, kodwa ababheka imisebenzi yalo nekusasa lezwe.
Okhethweni lwangoLwesibili lwamalungu ephalamende e-USA elaziwa ngeleCongress - elakhiwe yizindlu ezimbili – iHouse of Representatives neSenate, obekukade kuphethe khona iRepublican Party okuyiqembu likamengameli wakhona, uMnu Donald Trump, zijikile izinto.
Noma iRepublican Party ikwazile ukuwina ukhetho kwiSenate - okusho ukuthi iyaqhubeka ukuphatha le ndlu - kodwa kakuhambanga kahle kwiHouse of Representatives, njengoba iDemocratic Party idlule ngehubo.
Lokhu kuzokwenza ukuba uMnu Trump angazenzeli nje umathanda njengoba kade enza ngesikhathi zombili izindlu zephalamende ziphethwe yiqembu lakhe.
Kuzokhumbuleka ukuthi eminyakeni emibili edlule uMnu Trump neqembu lakhe bawina zombili izindlu, okwamnika amandla okuba akwazi ukufeza ezinye zezinhloso zakhe zokhetho, njengokuqoka amajaji ezinkantolo, kuhlanganisa neNkantolo eNkulu (Supreme Court).
Le nkantolo ibalulekile ngoba inamandla okwenza izinqumo eziwujuqu mayelana nomthethosisekelo waleliya lizwe.
Okuphawulekayo lapha wukuthi iDemocratic Party ikwazile ukunqoba enye yezindlu zephalamende phezu kokuba isimo somnotho e-USA sivuna uMnu Trump ngokuba sihle, futhi cishe zonke izakhamizi zikwazi ukuthola umsebenzi ngenxa yokukhula ngesivinini komnotho.
Okubukeka kucasule abavoti abangalivotelanga iqembu likaMnu Trump, wukumsola ngokuthi uvuna izakhamizi ezidla izambane likapondo nezinkampani, kanti izinkulumo zakhe zinenhlese yobuhlanga nokubandlulula, osekulimaze umoya wobumbano phakathi kwabantu base-USA.
Nxa sibuyela kuleli lakithi, kungasisiza ukuba nxa sivota kuwo wonke amazinga, sibheke uhlu lwabantu olusuke lukhishwe ngamaqembu ukuba siluvotele, ukuthi lunabantu esingaziqhenya yini ngabo ukuba basimele ephalamende noma cha. Ingwadla abavoti bakuleli ababhekene nayo wukuthi kabanalo ilungelo lokuvotela abantu ngqo njengoba kwenzeka e-USA, kodwa bavotela amaqembu okuyiwona aqoka abantu abazongena ezishayamthethweni zezifundazwe nasephalamende.
Kungasisiza njengezwe ukuba lokhu kulungiswe, kuthi ingxenye yamalungu ephalamende ivotelwe ngabavoti ngqo ukuze abantu bazi ukuthi baseka luhlobo luni lwabantu ukuba basingathe izindaba zokubuswa kwezwe.