Nangu-ke uRoger Sikhakhane ebengimazi
UKUDLULA emhlabeni kukaRoger Mboneni “Mshefi” Sikhakhane ngoMgqibelo entathakusa kungithusile, namanje kusenzima ukukwamukela ukuthi akasekho.
Ngiyazi ukuthi umngani wami ugule isikhathi eside kodwa ukuhamba kwakhe kakulula ukuthi ngikwamukele. Kungishiye nenxeba engingazi ukuthi liyovaleka kanjani.
Ngikhumbula ukuthi ngigcine ukumfonela ngeSonto eledlule emini ngebhadi ngahluleka wukumthola.
Ngibe sengithinta uCelinhlanhla “Stitch” Zungu ongomunye wabangani bakhe ngalo iSonto ukuba angitholele imvume kumawengane uSli Nene ukuze ngiyombona kwazise bese kunesikhathi elele esibhedlela.
Unembeza ubulokhu ungishaya ngokungenzi izinhlelo zokuyombona njengoba bengixinwa ngumsebenzi nangaphezu kwalokho bekunzima nokuxhumana naye ngocingo. Bengithola inqwaba yezingcingo kubantu abasondelene naye bebuza ngesimo sakhe sempilo.
Omunye wabo nguMkhonzeni “Professor” Langa ongumculi wekwaito onginxuse ukuba ngimazise uma izinhlelo zokuyobona uRoger sezihleliwe.
Ngebhadi elikhulu konke besekuqondile kanti angibuzanga elangeni ukuthi iqhawe lami lizongishiya ngokukhulu ukuzuma.
Ngishayelwe ucingo ngoMgqibelo ekuseni nguGordon Masondo oyimenenja ye-Alexander Black Aces engibuza ukuthi ngabe ziyiqiniso yini izindaba zokuthi uRoger usedlulile emhlabeni.
Nakuba ngizamile ukuba nesibindi engxoxweni yami noMasondo kodwa uzifundele kwezakhe ukuthi kangisekho kule nkulumo angitshela yona wacela ukuxoxa nomama wasekhaya.
Ngesikhathi ngihleli endlini kusofa ngizibone ngikhala mi izinyembezi zizehlela kwazise bekubuya konke ebesikwenza naye, nanokuthi kangizange ngisalithola ithuba lokuyombona umngani wami esibhedlela. Ngikholwa wukuthi kuzongithatha isikhathi ukuvuma ukuthi uRoger ngeke ngiphinde ngisambona useye koyise mkhulu. Bengikade nginezinhlelo noMinenhle Mkhize oyintatheli yeZemidlalo kwelinye lamaphephandaba zokuya emdlalweni weRoyal Eagles neMaccabi FC ngoMgqibelo eChatsworth Stadium ngeledlule.
Ngesikhathi engifonela uMkhize efuna sihambe kumcacele ukuthi ngeke ngisakwazi ukuyobuka umdlalo kwazise umoya ubusungemuhle.
Phela uRoger iyona kilabhu abeyithanda ngenhliziyo yakhe yonke kwazise uyijoyina nje kudala ayefisa ukuyicija kodwa kunzima. Kuningi engingakuxoxa ngoRoger kungaphela u-inki. URoger ubengumuntu wabantu. Ubengezwani nokubona omunye umuntu eswele.
Ubezama kuze kweqe ukuthola ikhambi lokusiza omunye umuntu. URoger ngisho umehla noma ngaluphi uhlobo ubungeke umuzwe ekuphendula.
Yindoda ebihlala ihleka ngaso sonke isikhathi. Ubenenhliziyo enhle. Ubekwazi ukugqoka ngobunono, kangisayiphathi-ke eyokunuka kahle.
Ubekuthanda ukuba sezindaweni eziphambili nabangani bakhe kujatshulwe. Ngikhumbula ngelinye ilanga siphuma kobuka omunye umdlalo usicelile nabanye ozakwethu ngithi besiyela ku-10 ukuba sihambe naye siye kwenye indawo yokucima ukoma ekuFlorida, eMorningside.
Siyile kule ndawo, uma ngimazisa ukuthi kuyakhokhwa emnyango, ungitshele emehlweni ukuba ngikhululeke ngoba ngihamba naye.
Usikhokhele sonke. Okuhle ngaye wukuthi ubengeyona lenhlobo echomayo ngemali kumbe inzuzo anayo empilweni.
Kuningi ebesikuxoxa naye ngempilo kwazise ubengitshela ngokufanele ngikwenze empilweni ngaphambi kokucabanga izinto zokuzithokozisa.
Ngikhumbula engimemile kumqhudelwano wakhe iRoger Sikhakhane Tournament ebakhona njalo uma kuphela isizini, ngenhlanhla enkulu sikwazile ukuxoxa okuningi naye. Ubehlale engikhumbuza ukuthi kubalulekile ukuba sisebenzele izingane kusakhanya, kungathi uma sesidlulile emhlabeni izingane zidonse kanzima.
URoger ubenezinto eziningi ebezimungenisela imali kodwa ubengaziphakamisi. Ubengitshela emehlweni ukuthi ibhola kumele kube yilona elincenga yena.
Kuthe ngelinye ilanga sidlula endaweni yakhe ebisakhiwa eMelmoth wangicela ukuba ngiphume emotweni siyibuke.
Ubesalindele amawindi awathenge phesheya kwezilwandle abezowafaka.
Ubekubeka kucace ukuthi uma ungena ebhizinisini lezindlu ngeke nangengozi uhlupheke empilweni.
Bekubanzima ukunqaba uma ubizwa uRoger, uke wangibiza ngisetohweni ekwenye yezindawo eziphambili eduze kwamahhovisi ethu kwazise ubeqinisekisa ukuthi uyangibona uma eseThekwini.
Ngigcine ukuba naye uRoger sinoMkhize ngesikhathi i-Eagles iyophisana ngokudla emindenini edonsa kanzima eMbumbulu.
Ngemuva kwalo mcimbi siye kwaMax’s Lifestyle siyothiba ilanga kwazise bese sesifile yizintuli zaseMbumbulu.
Kuthe izikhathi sezihambile impela kule ndawo watshela ozakwabo kwi-Eagles ukuthi uzohanjiswa yithina noMkhize bexwaya ukuthi angahamba kanjani ngemoto encane ekubeni bona behamba ngohuntshu lwakwaMercedez Benz.
Ubengabakhethi abantu uRoger kukhona isikhathi lapho uClinton Larsen esasebenza kwiBloemfontein Celtic eshonelwe ngubaba wakhe ngabona ngemoto yakhe emnyango ecela ukuba ngimphelezele siye emngcwabeni ngavuma ngenxa yokuthi inhliziyo yakhe yayingeke ibe nokuthula uma nginqaba.
Okunye ebengikuqaphela ngaye wukuthi ngisho kwenzeka izigameko zokukhonjwa indlela yiChippa United ubungeke umuzwe ekhuluma kabi ngoSiviwe “Chippa” Mpengesi kodwa kunalokho ubemane akutshele ukuthi kuzolunga.
Ngisho kukhona ikilabhu emshelayo ubengithinta angazise ngoba efuna ukuzwa uvo lwami ngayo.
Lokhu bekungitshengisa ukuthi ungikhonze kangakanani bengizibona ngibalulekile empilweni yakhe.
Nangesikhathi eseshiya kwiRichards Bay FC ephethwe ngumngani wakhe uS’fiso “Jomo” Biyela kwabanzima ukutshela uBiyela ukuthi ucu kalusahlangani.
Ubefuna ukushiya nje ubelokhu engikhalela ngesikhulu esithile abesebenza naso kwiBay FC athi simuxova umoya.
Nokho kwangithokozisa ukuthi ukuhamba kwakhe kwiBay FC akubenzanga izitha noBiyela kwazise ubesemthatha njengomfowabo.
Ngiqale ukwazana naye uSikhakhane ngisebenza kwiDurban Bush Bucks isaphethwe nguMlungisi “Professor” Ngubane saxhunyaniswa ngu-Agrippa Nyawuza ozinze eRichards Bay.
Ngaleso sikhathi ubesaqala ukuqeqesha iReal Classic FC kaDkt Cedric “Sgeme” Xulu ebigijima kwiSAB League ngaleso sikhathi ngaphambi kokuthenga ilungelo leRangers FC kuParam Joseph egcine isifudukele eRichards Bay. Ngikholwa ukuthi siqala ukubonana naye amagazi ethu azwana ngaleso sikhathi.
Ukuxhumana kwethu kuqhubeke isikhathi eside ngazithola sengicelwa yiIsland FC yakwaNongoma ngesikhathi iyodlala imidlalo yokuhlunga kwiVodacom League eWitbank ukuba ngihambe nayo ukuya empini. Ngaleso sikhathi bengenza umsebenzi wokuba yimenenja kwiWembezi Juventus kaSipho Makhathini.
Sisebenze kahle naye yize singakwazanga ukwenyukela kwiNational First Division (NFD) okwakuyiphupho lethu elikhulu.
Ngithi uhambe kahle mngani wami. Ngiyazi ukulwile ukubuyela esimweni sakho kodwa ophezulu ubesehlele elinye ikhasi. Imisebenzi yakho kayisoze yacimeka kimina nasesizweni sonke. Ubusithanda isifundazwe sakho iKwaZulu-Natal.
Okubi-nje kasibange sisakuchoma uphaphe lwegwalagwala usadla anhlamvana.
Uze ungakhohlwa umndeni wakho umama wakho, udadewenu kanye nezingane zakho mngani wami. Hamba Kahle, Mboma kaMqhele, Mathula, Nzimase, S’dwaba esinembobo, Wena sango elingezansi,lapho besa khona imilomo, Wena owangena nesikhuni emanzini sivutha, waphuma naso sivutha, Wena kaMboma os’hlahla samila edwaleni, Wena kaSoqhafuza, umlung’ odla izinkobe, Wena nyoka eyacaca emthini ingenazinyawo!