UBONA UKUZINIKELA KUBADLALI BAMABHOKOBHOKO
UNCOMA ukuzinikela kwabadlali bamaBhokobhoko uMzwandile Sticks ( osesithombeni) osethimbeni labaqeqeshi balesi sikwati esisohambeni olumqoka e-Europe.
AmaBhokobhoko azovovana inkani neFrance koweCastle Lager Outgoing Tour ngoMgqibelo ngo22h00 ekuhambeni. Elakuleli liyivule kabi le midlalo liguqiswa kabuhlungu yi-England ngo-12-11 eTwickenham.
“Kuhle ukubona abadlali bekhombisa ukuzinikela kukho konke abakwenzayo. Ubumbano oluseqenjini luyamangalisa. Kangingabazi ukuthi kuningi okuzozuzwa yiqembu ngendlela elenza kahle ngakhona.
" Kuyajabulisa nokuba khona kwabadlali abagijima e-Europe futhi engikholwa wukuthi bazobamba elikhulu iqhaza kuleli qembu. Sekusele kancane ukuba sifike ezingeni esaziwa ngaloa.
"Phela muva nje bese siqhelelene kakhulu neNew Zealand ngokwezinga,” kusho uSticks.
Umdlali wakuleli, uDamian de Allende, uthi balindele umdlalo onzima kakhulu kwiFrance.
“Sesikwedlulisile okwenzeke e-England.
"Kule midlalo kunzima kakhulu njengoba nesimo sezulu singesihle okwenza kube lukhuni ukudlala ngaphansi kwaso. Sizokwenza konke okusemandleni ukuthola umphumela omuhle kwiFrance,” kusho uDamien.
Nokho lo mdlali uyazi ukuthi kuzomele bazibambe ziqine uma bezimisele ngokunqoba eFrance.
Kulo mdlalo kuzokube sekubuye nabadlali abawumgogodla waleli qembu abadlala kwelase-Europe abebengekho kowe-England.