Bafuna ukugila iChiefs esengubo
UTinkler ujatshuliswa yisigwebo sabalandeli
UMQEQESHI weChippa United, u-Eric Tinkler ( osesithombeni), usongela iKaizer Chiefs ngaphambi komdlalo omqoka wala makilabhu ozogijinywa bengabonwa nangokhalo abalandeli.
La makilabhu azobhekana kowe-Absa Premiership ngoMgqibelo ngo-18h00 eMoses Mabhida Stadium, eThekwini.
IChiefs izogijima lo mdlalo ngaphandle kwabalandeli bayo kwazise isadonsa isigwebo semidlalo emithathu sokungaziphathi kahle kwabalandeli bayo ihlulwa yiFree State Stars kuyo le nkundla.
Ngumdlalo wokugcina lona ezowugijima kule nkundla ngaphandle kwabalandeli kwazise isiwugijimile owodwa ehlulwe kuwona yiPolokwane City ngo-1-0. Umdlalo wesithathu ulengisiwe.
UTinkler uthi bawulethelwe yiNkosi lo mdlalo, noma kanjani bazowunqoba.
“Kuyivela kancane ukudlala neChiefs bengekho abalandeli bayo. Ngakho-ke kufanele silisebenzise leli thuba. Abalandeli bayo babafaka omkhulu umfutho.
"Lokhu kubonakele ngesikhathi iChiefs ibhekene neSuperSport United koweTelkom Knockout kule nkundla, basizwe kakhulu ngabalandeli babo.
“Nathi-ke sifuna ukuyigila ekwenziwe yiPolokwane City ebahlulile bedlala nayo kungenabalandeli. Kukhona esiyibekele khona noma kanjani sizowunqoba lo mdlalo,” kusho uTinkler.
UMario Booysen odlala emuva kwiChiefs, uthi kunzima ukudlala ngaphandle kwabalandeli babo abawa bevuka nale kilabhu.
“Yisimo esingajwayelekile ukudlala ngaphandle kwabalandeli ngoba badlala enkulu indima. Ngaphandle kwabo kasiyilutho ngoba bayawufaka umfutho.
"Kunzima ukudlala abalandeli bengekho ngathi wumdlalo wokuzivivinya. Kodwa-ke kufanele sisamukele isigwebo bese sicela abalandeli bethu ukuba bangasondeli enkundleni, bamukele isigwebo.
"Nakuba kuzokuba nzima ukudlala ngaphandle kwabo kodwa sizozama ngawo wonke amandla ukuwunqoba ngoba siyayifuna iligi,” kusho uBooysen.