Uzishaya isifuba umqeqeshi wePirates
Uchoma ngokudida umqondo iSundowns
UZISHAYA isifuba uMilutin “Micho” Sredojevic ongumqeqeshi weOrlando Pirates ngokudida umqondo uPitso “Jingles” Mosimane owenza umsebenzi ofanayo kwiMamelodi Sundowns. La makilabhu ahlonishwayo ebholeni lakuleli azotholana phezulu koweAbsa Premiership ngoMgqibelo ngo-15h30 eLoftus Stadium, ePretoria. IBucs iya kulo mdlalo nje, ihambela phezulu njengoba isiqhwakele esicongweni se- log.
Ihlale esicongweni emuva kokuba ihlule iPolokwane City ngo-2-1 koweligi ngoLwesibili kusihlwa ePeter Mokaba Stadium, ePolokwane.
Inqobe lo mdlalo ngamagoli abhakuziswe enethini nguMarcelo noJustin Shonga. ElePolokwane lishaywe ngu-Ayanda Nkili.
Ukunqoba kweBucs lo mdlalo kukhuphule isasasa lomdlalo wayo neDowns njengoba uSredojevic ekubeke kwacaca ukuthi ufuna ezakhe zihlale unomphelo esicongweni.
Uthi into emjabulisa kakhulu wukuthi umdide umqondo uMosimane njengoba kungelula ukuqagela isikimu angase aqale ngaso.
“Abantu abaningi bakhonondile sishintsha isikimu, sisixova ngendlela ehlukile. Ukusixova kwethu bekuyindlela yokunika abanye abadlali bethu ithuba ngoba siyabethemba.
"Njengamanje kunzima kumqeqeshi weSundowns, akazi ukuthi uzosihlelela kanjani. Phela akaqondi ukuthi singase sisibophele kanjani isikimu.
“Kwamina ngiphithene ikhanda ngoba abadlali esengibanike ithuba bonke benze kahle. Kangazi ngempela ukuthi ngizobophela bani kodwa okumqoka wukuthi kufanele siwunqobe lo mdlalo. Konke lokho singakwenza kwazise konke kulele kithina,” kusho uSredojevic.
UMosimane uthi kuyena yonke imidlalo iyafana.
“Into emqoka wukuthola amaphuzu. Yingakho yonke imidlalo kithina ifana. Siyazi ukuthi wumdlalo omkhulu lona kodwa-ke siyakwazi okufanele sikwenze.
"Siyizingqwele zeligi ngakho-ke isipiliyoni sinaso sokuyinqoba (iPirates). Kunzima ukuhlula iSundowns emidlalweni yeligi ngoba (iDowns) iyazi ukuthi inqotshwa kanjani (iligi),” kusho uMosimane.
Isiyonke imidlalo ye-Absa Premiership ehlelelwe ukugijinywa ngale mpelasonto iqhathwe kanje:-
KUSASA NGOLWESIHLANU
EHarry Gwala: Maritzburg United vs Highlands Park 20h00 (SS4). NGOMGQIBELO ELoftus Versfeld Stadium: Mamelodi Sundowns vs Orlando Pirates 15h30 (SS4, SS10 nakwiSABC1).
EPrincess Magogo Stadium: Golden Arrows vs Baroka FC Baroka FC 15h30.
EMoses Mabhida Stadium: Kaizer Chiefs vs Chippa United 18h00 (SS4).
EGoble Park: Free State Stars vs SuperSport United 20h15 (SABC1).
EBidvest Stadium: Bidvest Wits vs Bloemfontein Celtic 20h15 (SS4). NGESONTO EKing Zwelithini Stadium: AmaZulu FC vs Polokwane City 15h30 (SABC1).
ECape Town Stadium: Cape Town City FC vs Black Leopards 15h30 (SS4).