Ufele U-R1 440 wesitokofela
Kungenelwe abesifazane badutshulwa
UTHUKA izanya umphakathi waKwaNtunja, eMelmoth, emuva kokuba kungenelwe abesifazane ababili bakule ndawo kwadutshulwa, kwabulawa oyedwa, kufunwa imali yesitokofela ngeledlule.
ILANGA lithole ukuthi kungene amadoda amathathu emzini wakwaDludla kule ndawo, efake izigqoko ezifihla ubuso athi afuna imali.
Agcine edubule abulala uNkz Thobile Dludla (29) obenodadewabo, uNkz Mpilonhle Dludla (34) - okwazile ukuphunyula wacela empunzini - akhala emuka noR1 440 awuthole endlini.
Ekhuluma neLANGA udadewabo kamufi, uthi ngosuku lwesigameko ubephuma edolobheni ephethe u-R1 440 abewuphathiswe ngamanye amalungu esitokofela ukuba awunikeze unina ukuze uzohlanganiswa nenye imali ebisebhange.
Uthi imali yesitokofela ihlanganiswa phakathi nenyanga, kodwa laba abebemphathisile yingoba bahola ngokuphela kwenyanga.
Utshele leli phephandaba ukuthi emuva kwesikhashana engene endlini yena nomufi bezwe izigi zabantu egcekeni. Uthi ngesikhathi bethi baphuthuma ukuyovala isicabha, laba abesilisa basidudule savuleka.
“Bangene endlini bephethe isibhamu bathi bafuna imali, masiyikhiphe lapho ihlala khona. Sibatshele ukuthi kasazi ukuthi bakhuluma ngani futhi kasiyazi imali abayifunayo. Basiyalele ukuba sithule singamemezi ngoba bazosidubula uma singawulandeli umthetho wabo. Kube nokudonsisana phakathi kwethu nabo, sizama ukubanqanda ukuba bangene emagunjini okulala ngoba bekukhona u-R1 440 phezu kwesiqamelo kwelinye lamagumbi.
“Ngenhlanhla mina ngikwazile ukuphunyuka ngabaleka. Ngizwe kuqhuma isibhamu endlini kanti sekudutshulwa udadewethu ngoba ubememeza efuna usizo,” kusho uMpilonhle.
Uthi uphindele endlini eyobheka wathola udadewabo edindilizile, eseshonile. Uye egunjini lokulala wathola ukuthi imali ebiphezu kwesiqamelo ithathiwe.
Utshele ILANGA ukuthi kumanje bahlafuna bejeqeza kuhle kwenyamazane uma behamba endaweni ngenxa yokwesaba. Uthi unina uphithanelwe yikhanda ngokudlula emhlabeni kukadadewabo.
“Kuduma ikhanda kumama, akazi ukuthi uzothathani ayihlanganise nani,” kusho yena.
Okhulumela uMasipala waseMthonjaneni, uMnu Thami Shangase, uthi babikeliwe ngalesi sigameko, wathi: “IMeya yaseMthonjaneni, uMnu Sibonginkosi Biyela, ihlanganile nomndeni wakwaDludla yathi izolekelela ngezindleko zomngcwabo. Umkhandlu ukhathazekile ngezinga lobugebengu obudlangile kule ndawo, usebenzisana namaphoyisa namalungu eCPF ukuze kuliwe nabo.”
UMnu Malusi Mpanza, ongumeluleki wezezimali ozimele, uthe njengoba sekusondele isikhathi sokuba abantu bahlukanise izito- kofela, kungakuhle ukuba imali bangayigcini emakhaya, kodwa bayifake emabhange.
“Abantu kumele baye emabhange bacele umuntu obizwa ngepersonal banker abasize ngokuvula ikhadi elizohlala imali yesitokofela bese ebacazela yona ingene kuma-akhawunti abo ngokwehlukana. Esitokofeleni sokudla kungamele benze ikhotheshini esitolo sokudla, eveza ukuthi kuzoba yimalini okuzothengwa bese kufakwa imali ekhadini lasebhange,” kusho uMnu Mpanza.
Okhulumela amaphoyisa KwaZulu-Natal, uColonel Thembeka Mbhele, uthi likhona icala lokubulala elivuliwe esiteshini samaphoyisa eMelmoth, bekungakaboshwa muntu, kusaphenywa.