OQOTHE (7) UBETHEMBISE UKUBAKHELA UMUZI
Ubebakhohlisa ethi ungudokotela
EKHASINI 2
UBETHENJISWE ukwakhelwa umuzi kanokusho ngu-Ernest Mabaso, obezibiza ngoSibusiso Khoza (27), ongumsolwa ecaleni lokubulawa kwamalungu awu-7 omndeni owodwa uNkk Thoko Khoza (70) waseMgungundlovu, okushone amadodakazi akhe kulokhu kubulala.
UNkz Mbali Khoza (51), oyinkosazane, uNkz Dudu Khoza (46) omelamayo, uNkz Nomfundo Khoza (28), oyindodakazi kaDudu obenguthisha, uKarabo Khoza (11), uLuyanda Khoza (7), uNkanyiso Khoza (2) noSibongakonke Khoza (2) abangabazukulu, bafihlwe ngeSonto emuva kokutholakala kwezidumbu zabo zimbozwe ngenhlabathi endlini, eVlakfontein, eGoli ngeledlule.
ILANGA livakashele uNkk Khoza ngemuva kwezinsuku ezintathu kungcwatshwe umndeni wakhe. Uthi kubulawa umndeni wakhe ngalolu hlobo nje, bebesajabulela ukuthola ukuthi sekunomuntu wesilisa emndenini njengoba amadodana akhe ashona wonke, kanti enye iboshiwe.
“Bengisajabulela ukuthola ingane yomfana, ngibonga nakubantu bakithi abadala ngokusitholisela indodana yomfowethu ongasekho, kanti kangazi ukuthi ngijabulela umuntu ozobulala izingane zami ebesengisele nazo emhlabeni.
“Kumanje ngisele nezingane zikadadewethu ongasekho emhlabeni, siqothwe sonke isisu sami,” kusho yena.
Yize ebekuveza ukuthi sibuhlungu isigameko esimehlele, kodwa ubebonakala ukuthi usesamukele isimo njengoba ekwazile ukula- ndisa leli phephandaba ukusuka nokuhlala ngokufika kukamsolwa emzini wakhe kuze kube uqotha umndeni.
“Bengisajabulela ukuthi ziyanda izifundiswa kwaKhoza njengoba uNomfundo ubenguthisha nalesi sigebengu besiqamba amanga sithi singudokotela. Besingithembise ukuthi sizongakhela umuzi kanokusho uma sesiqalile ukuhola ngoba uyise uze washona engangakhelanga.
“Ubeyingane ehloniphayo, ngisho ekhuluma bekuzwakala ukuthi kukhuluma isifundiswa. Ngisho uxoxa naye ubekhuluma izinto eziphu- sile, ku-zwakala ukuthi ngumuntu onolwazi ngempilo,” kusho uNkk Khoza.
Utshele ILANGA ukuthi umsolwa ufike emzini wakhe phakathi noNtulikazi (July), wabatshela ukuthi walahlwa ngunina esemncane, ukhulele ekhaya lezintandane. Ubatshele ukuthi unina wathi uyise ngowakwaKhoza eMgungundlovu.
“Kangizange ngiyexwaye le ngane ngesikhathi ifika ngoba bengimazi uyise ukuthi ushone eyisoka. Kube lula nje ukuthi siyikholwe ukuthi ngeyakhe ngempela. Ifike namadodakazi ami abesazi ngayo njengoba ibixhumana nawo ezinkundleni zokuxhumana, nakhona kangazi ukuthi baxhumane kanjani.
“Ihlale isonto elilodwa lapha ekhaya, uMbali wabe eseyifakela imali yokuthi igibele iye kuyena eGoli khona ezoyizamela amatoho kunokuthi ihlale la nami ingasebenzi. Ngesikhathi ihleli nami, ngicele ukuba ingiphekele, yangiphekela ukudla okumnandi. Kuthe noma isihamba sasala isikhala sayo ekhaya ngoba besesijwayele ukuthi kukhona ingane yomfana egcekeni, injalo nje ibikhuthele,” kusho uNkk Khoza.
Uthi eseseGoli umsolwa, bebefonelana babuzane impilo. Kuthe noma esethole umsebenzi wamtshela ukuthi useqalile ukusebenza njengodokotela, usezoqala amfakele nemali, amakhele nomuzi amthembise wona.
UNkk Khoza uthi yize engumuntu okholelwayo emadlozini nasezintweni zesintu, kodwa umoya wakhe ubungamholeli ekuthini abike umsolwa kubantu abadala njengendodana esitholakele emagcekeni akwaKhoza.
Uthi umsolwa uze wayohlala namadodakazi akhe eGoli engakaze anyathele endlini yabantu abadala. Ngesikhathi ILANGA lixoxa noNkk Khoza ubelokhu ekhale njalo ngomsolwa wesibili, onguMnu Fifita Khupe (61), okuvele ukuthi ubeyisoka lendodakazi yakhe endala, uMbali.
“Ngiqale ukulazi ngoZibandlela (December) wonyaka odlule ngesikhathi ngiyodla uKhisimusi emzini kaMbali, ngiyobona nomuzi wakhe abesanda kuqeda ukuwakha. Umoya wami kawuzange ulithande ngiqala ukulibona. Ngacikwa wukuthi yikhehla elimnyama, elibi kanti mina ngizele izipawupete zamantombazane. Ngiphinde ngadinwa nawukuthi kalisebenzi, belenzelwa yindodakazi yami yonke into, seliphenduke umnumzane emzini wayo,” kusho yena.
Uthi kube nzima ukuthi ayitshele indodakazi yakhe ngenxa yokuthi ibibonakala ukuthi isothandweni. ILANGA lixoxe noNkz Sne Khoza (22) osinde emlonyeni wengwenya kubulawa laba abawu7 ngoba yena ubesebuyele eMgungundlovu.
“Bengihlala nomamkhulu (Mbali) naye umsolwa (Ernest). Ngesikhathi kwenzeka lokhu (kubulawa uDudu noMbali) bengivakashele uNomfundo emzini wakhe. NgoMgqibelo abulale ngawo izingane, ufike ezozilanda, nami ngikhona endlini, wathi ufuna ukuzikhipha ngoba ubeholile.
“Ngesikhathi ehamba nezingane, ngithole umqhafazo ongibizela eThekwini kumuntu engingamazi, engitshela ukuthi ngiyadingeka ngokuphuthuma ukuthi ngiyokwenza inhlolokhono kanti bekungumsolwa engixosha ngesitayela, enzela ukuthi ngingabikhona uma esebulala uNomfundo,” kusho uNkz Khoza. Ngesikhathi ekhuluma neLA
NGA, ubesazibuza ukuthi usinde kanjani ukuthi umsolwa angambulali yena, kungani eze wamcabangela wakhetha ukuba amxoshe, aye eThekwini. Uveze ukuthi bonke laba babulawe ngezinsuku ezahlukene.
Bathole ukuthi kuqale kwabulawa uMbali noDudu, kwaphela isonto umsolwa ehleli nezidumbu zabo endlini, ngoMgqibelo wabe eselanda izingane zikaNomfundo eyozibulala. NgeSonto ufonele uNomfundo embizela endaweni yesigameko, naye wafike wambulala.