Owe-OPW udalula ezakhe zothando
Uphumele obala kubazali bakhe ngothando lwakhe nowesifazane
UZIZWA esekhululekile emuva kokuphumela obala ngothando lwakhe nomunye wesifazane umethuli wohlelo i-Our Perfect Wedding (OPW), uNomsa Buthelezi, osekuyindaba eyaziwayo ezindaweni ezahlukene ukuthi uthandana noZandile Shezi waseMnambithi. Engxoxweni ekhethekile ne
LANGA, uNomsa, oseke wabonakala emidlalweni eyahlukene kamabonakude, ukubeke kwacaca ukuthi nakuba kumthathe isikhathi ukuba akhulume ngokukhululeka ngokuthandana nomuntu onobulili obufanayo nobakhe, kodwa akakaze azenyeze nakancane ngobuyena.
“Bekuyinto ebengiphila nayo kusukela kudala, kodwa bengingakabi nesibindi sokwazisa abazali bami ngempilo engiyiphilayo. Yize ngokuhamba kwesikhathi bagcine bebona, kodwa bengingakaze ngibazise,” kusho lo saziwayo enanela ngokuthi manje njengoba abazali bakhe sebazi futhi bamamukela ngempilo ayikhethile, usezizwa ekhululeke ngaphakathi futhi akasiboni isidingo sokuqhubeka nokuphila impilo eyimfihlo.
“Bekungekhona ukuthi bengiyifihlile impilo ebengiyiphila, wukuthi bengingakhulumi ngayo. Manje sengingasho noma yini ngothando lwami,” kusho uNomsa ozalelwe wakhulela e-Alexandra, eGoli.
Uthi manje abantu sebezokwazi yena uqobo lwakhe ngaphandle kokuqagela ngaye. Echaza ngokuhlangana kwakhe noZandile, uthi bekusemshadweni eMpumalanga, baqale ngokuba ngabangani.
“Mina ngizibonele umZulu ngachazeka, kwazise ubefake nomqhele ekhanda. Sashintshana ngezinombolo, saqala ngokuba ngabangani,” kusho yena.
Uthi nakuba ebebona ukuthi ingxoxo yabo ngoWhatsApp ibheke kuphi, kodwa akafunanga ukumhambela phambili uZandile njengoba elinde kwaze kwaba nguyena obeka amagama othando.
“Nakuba ngiziphaphele kodwa uma kuyiwa ngasothandweni, nginamahloni, yingakho ngilinde yena alibeke ngembaba elothando,” kusho uNomsa ehleka.
Lo saziwayo, ongathandanga ukuveza iminyaka yakhe yangempela, uthi okwamanje kabajahile ukubeka uthando lwabo kwesinye isigaba, basakuthokozela ukuzijolela.
“Ngisakujabulela ukumvakashela eMnambithi sichithe isikhathi ndawonye, sihambele izindawo ezahlukene KwaZuluNatal, ngaphandle kokuba namahloni,” kusho yena.
Uthi okunye osekumkhululile ngalolu thando akulona, wukuthi nezingane zakhe uhlalile nazo phansi wazichazela ngempilo yakhe, zamamukela futhi zayiqonda kabanzi.
“Okungijabulisayo wukuthi sebekhulile njengoba omdala ena-14 owesibili ena-12,” kusho uNomsa. Uthi lezi zingane uzikhulisele yedwa, ngakho usondelene kakhulu nazo, yingakho kungabanga lukhuni ukuzichazela ngaye.
UNomusa uthi usehlalile phansi nesithandwa sakhe wasichazela ngempilo yokuba phambi kwabantu ukuze singaxwayi uma bevela emaphephandabeni.
“Bengazi ukuthi ngemuva kokuphumela obala abezindaba bazoba nentshisekelo ngempilo yethu, ngakho bekumele ngenze izinto zibelula kuyena ukuze aqonde ngempilo yokuba phambi kwabantu,” kusho lo saziwayo eveza nokuthi kubalulekile ukuba abantu bakhululeke ngalokhu abayikho futhi nabazali bakhulule izingane zabo ziphile impilo yazo ngaphandle kokuzenyeza.
UNomsa uthi ukhule eyinga- ne evele iziphaphele futhi ehlakaniphile njengoba edluliswe amakilasi aze aba mathathu.
“Ukuba phambi kwabantu ngikuqale ngisafunda amabanga aphansi njengoba bengenza imidlalo yeshashalazi. Yingakho ngesikhathi ngineminyaka ewu-13 ubudala ngingene kwezeshashalazi ngokugcwele,” kusho yena.
Uveze ukuthi nakuba evela kumabonakude, kodwa uthando lwakhe lusemidlalweni yeshashalazi.
“Ngikhuluma nje ngonyaka ozayo ngizothi ukugxila kancane eshashalazini ngoba kunomdlalo engizobe ngimatasa nawo,” kusho yena eqhuba ngokuthi nomdlalo iLockdown, abelingisa kuwo indawo kaSlender, ukhuza ibuya.
Uphethe ngokuthi uyakutho- kozela kakhulu ukuba kwi-OPW ngoba imfundisa okuningi okuphathelene nothando.
“Uthando yinto emnandi futhi ebalulekile empilweni, ngakho ngiyakuthokozela ukwethula lolu hlelo oluhlanganisa imindeni,” kusho lo saziwayo.
Ube eseveza ukuthi indodana yakhe eneminyaka ewu-14 ike yabhekana nokuhlukunyezwa ngamabhoklolo ngenxa yokuthi unina uthandana nowesifazane, yaqina njengendoda.
Ngaphandle kokushayela i-OPW nokudlala kwiLockdown, uNomsa uke walingisa kwiSibaya edlala indawo ka-
Bengazi ukuthi abezindaba bazoba nentshisekelo ngempilo yethu.