UMLANDO KWI-
KUQOPHEKE umlando kuphuma uThando kowe-Idols SA izolo ngeSonto njengoba isibalo samavoti sifinyelele ku-110 million.
Lesi sibalo sedlula zonke izinhlelo zemincintiswano ezikhona kumabonakude eNingizimu Afrika.
Lo mncintiswano ufinyelela kulesi sibalo nje, ngeSonto kuzobe kungolwamanqamu njengoba kuzobhekana uYanga noThato. UProverb ongumethuli nongomunye wabadidiyeli be-Idols SA, izolo nguyena omemezele ukuthi isibalo samavoti kusukela kuqale ukuvota kwi- top 16, sesifinyelele ku-110 million.
Lo mncintiswano ungene esigabeni se- top 2 njengoba bese bebathathu abasele futhi abathole ithuba lokuya eDubai. Ngaphandle kokuthola leli thuba, uThato, uYanga noThando bazwise abantu izingoma zabo okokuqala abaziqophile kulo mncintiswano.
UThato ucule ingoma yakhe ethi “Blow By Blow” kodwa uSomizi ongelinye lamajaji, uyihlabe wayihlikiza waze walibeka ngembaba elokuthi “libi leli culo”. UYanga ucule eyakhe ethi “Scars” amajaji uSomizi no-Unathi baze basukuma bekhombisa ukuyithakasela noRandall nakuba engasukumanga, kodwa umncomile lo mculi.
UThando yena ucule eyakhe ethi “Wasting Time” nayo echaze amajaji. NgeSonto elizayo ngelamanqamu njengoba kuzobhekana uYanga noThato. Lo mncintiswano ungomu-nye wemikhulu eNingizimu Afrika njengoba ozodla umhlanganiso ezogoduka nemiklomelo yesamba sika-R1.5 million, okubalwa kuyona nemoto. Ukuvotela ozodla umhlanganiso kuzovalwa ngoLwesine kusihlwa.