Bakhala ngamabhasi
Abagibeli bafisa nokuba abuyele kuMasipala weTheku
SIKHULU isililo ngokushoda kwamabhasi akwaTransnat Durban, kubagibeli baseThekwini namaphethelo njengoba kuthiwa abengafiki ngendlela ejwayelekile ezitobhini.
UNkk Thembi Ngubane waseMlazi, ongumgibeli wala mabhasi, utshele ILANGA ukuthi kusukela ngeledlule amabhasi abengafiki ezitobhini, kokunye afike emuva kwesikhathi. Uthi yize ehamba emgwaqweni, kodwa ayidlanzana.
Uveze ukuthi le nkinga kayiqali manje, isineminyaka.
Ukhale ngokuthi bayaye bashaye amathikithi enyanga, okuye kuthi uma amabhasi engasafiki, baphoqeleke ukuboleka imali komakhelwane ukuze bagibele amatekisi uma beya emsebenzini.
“Ayinkinga amabhasi esiwagibelayo futhi kawathembekile. Kasazi ukuthi yini inkinga yokungafiki kwawo ngoba akekho osichazelayo ukuthi ikuphi inkinga,” kusho uNkk Ngubane.
Uthe bangajabula uma amabhasi engabuyela ekuphathweni wumasipala.
UNkz Siphesihle Ngema, naye ongumgibeli, uthi ugibela ibhasi ngoba ezama ukonga imali, kwazise amatekisi amba eqolo. Uthi ngokujwayelekile amabhasi uma eseqale izinto zawo zokungafiki, kuke kuthiwe aphelelwe wudizili.
“Uma abaphethe behluleka wukuwaphatha ngendlela efanele, kungcono avele avalwe ngoba anezinkinga eziningi, kungenjalo abuyiselwe kumasipala,” kusho uNkz Ngema.
Okhulumela uMasipala weTheku, uMnu Msawakhe Mayisela, uthe kuyiqiniso ukuthi amabhasi akwaTransnat anokuphazamiseka, yize umbiko mayelana nokuthi yini imbangela ungakakhishwa.
“Umasipala wenza konke okusemandleni ukuqinisekisa ukuthi amabhasi azosebenza ngojwayele- kile maduze,” kusho uMnu Mayisela.
Uxolise kakhulu kubagibeli ngokuphazamiseka kokuhamba kwamabhasi.