Liza kahle ibhizinisi lakhe lezingodo
Uzithumela eChina ziyokwenza ifenisha
UKUSEBENZA emahlathini esika izingodo, kumvulele iminyango yempumelelo usomabhizinisi waseChesterville, okumanje unenkontileka yokuthumela izingodo zokwakha ifenisha eChina.
UMnu Xolani Ntuli (40), ongumnikazi weXKG Logistics - ongenaso isikhathi esingakanani engene ebhizinisini lokudayisa izingodo njengoba eqale ngo-2015 - uthumela izingodo eDongguan, esifundazweni iGuangdong, eChina, okuyisizinda lapho kwakhiwa khona ifenisha.
Uthi ukuthola kwakhe le nkontileka bekungeke kuze kwenzeke ngaphandle kosizo loqeqesho aluthole kwabakwaTrade and Investment KwaZulu-Natal.
“Bangisize kakhulu kwaTrade and Investment ngokungifundisa kabanzi ngezokuhweba njengoba bengingazi nokuthi yimalini engingayibiza ngokwenza lo msebenzi. Baphinde bangicathulisa ngokusayina le nkontileka yokuhambisa ama- container awu-20 eChina. Baze baya nami ehlathini ukuyongikhethisa lezi zingodo ezidingwa yikhasimende lami,” kusho yena.
Uthi zikhona izinselelo abhekane nazo njengokuthola imali yokuhambisa lezi zingodo njengoba kumba eqolo ukuqasha iloli elizosusa ikhonteyina ehlathini liyise emkhunjini.
“Ngithole lo msebenzi ngingenalo ngisho isenti ephaketheni, ngazama ukucela usizo kubantu engibaziyo asebephumelele emabhizinisini abo, kodwa bangichitha. Iningi belithembisa kodwa ligcine lingangisizanga. Bengidinga u-R50 000 ukuze ngikwazi ukuhambisa i-oda lami lokuqala.
“Ngize ngasizwa ngumuntu engingamazi wangilekelela ngagcina ngikwazile ukwenza lo msebenzi. Ngemuva kwalokho, umsebenzi uye wenzeka njengoba kumanje ngimatasa ngilungiselela ukuhambisa omunye umsebenzi,” kusho yena.
UMnu Ntuli yize engenawo amahlathi athi yena, izingodo esazithenga kodwa kumsizile ukusebenza emahlathini isikhathi eside ngoba kumenze wabazi abalimi abaningi abatshale lolu hlobo lwezihlahla alufunayo.
“Ngi-oda kakhulu eNelspruit, eMpumalanga, naKwaZulu-Natal yonke, inqobo nje uma ngizothola isivuno esikahle ngentengo ekahle,” kusho uMnu Ntuli.
Uthi okwamanje usazibambele mathupha ebhizinisini lakhe njengoba engakabi nalo ihhovisi, konke esakwenza ngocingo ekhaya.
Uthi uma kuyiwa ehlathini, kunabantu abawu-5 ayaye abasebenzise ukuqinisekisa ukuthi yonke into yenziwa ngendlela. Laba bantu uthi baye basize ukuhlela izingodo elolini kwazise umshini uma uzilayisha kawuzitaki kahle. Baphinde bazihlele kahle nawi- container.
“I- container ilayisha izingodo eziwu-50 kuphela, uma umthwalo seweqile bayakubiza emkhunjini bathi uphungule. Kuba nzima kakhulu ukwenza lokhu njengoba usuke ungasekho umshini, sekufanele wehlise izingodo ngezandla zisinda zinjalo,” kusho uMnu Ntuli.
Uthi uma izinto sezihamba kahle, uzimisele ngokuba nehhovisi eChina ukuze asondelane nekilayenti lakhe.
Ugqugquzele intsha enesifiso sokuhwebelana namanye amazwe ukuba ingahambeli kude nehhovisi lakwaTrade and Investment KwaZulu-Natal. Uthi leli hhovisi linoqeqesho lwamahhala kwabafuna ukuhwebelana namanye amazwe.
Libafundisa baze bathole ilayisensi yezokuhweba namanye amazwe, libasize nangokuthi kufanele babize kanjani uma sebethole amakilayenti.