I-1KZN TV igubhe iminyaka eyishumi
SIGUBHE iminyaka eyishumi sisemoyeni isiteshi somphakathi sikamabonakude, i-1KZN TV. Umcimbi ubusezindlini zokusakaza eRichards Bay kanti ubuhanjelwe yizicukuthwane ezahlukene, okubalwa kuzo ezikahulumeni, abefundisi nosomabhizinisi.
Ngokusho kukaDkt Themba Fakazi, ongusihlalo webhodi yalesi siteshi, kuyabajabulisa ukusibona sikhula.
“Kuyasijabulisa ukuthi njengoba sigubha iminyaka eyishumi, sesizimele futhi sesiyaze- nzela izinto eziningi ngaphandle kokuncika kwezinye izinkampani,” kusho uDkt Fakazi enanela ngokuthi okunye okubajabuli-sayo wubudlelwano abanabo namanye amazwe aphesheya kwezilwandle.
“Ngikhuluma nje ngisanda kubuya e-Indonesia lapho besiyozama amaxhama okusebenzisana nesinye seziteshi zakhona,” kusho uDkt Fakazi ethi okwamanje banobudlelwano nesiteshi, iVoice of America, yaseMelika ne-Al Jazeera.
Uthi okuhle ngalokhu wukuthi basezingxoxweni nalezi ziteshi ngenhloso yokuqeqesha izintatheli zabo.
“Kuyasithokozisa nokuthi eminye yemisebenzi esiyikhiqizayo bayayithatha bayikhombise emazweni abo. Imisebenzi esiyiqophayo yehlukile kakhulu, yingakho beyithokozela,” esho.
Uthi nakuba kukuningi okuhle abaziqhenya ngakho kule minyaka eyishumi kodwa zikhona izingqinamba abasabhekene nazo njengokugqoza kwezikhangiso okuyizona eziletha imali.
“Kuletha ithemba ukubona uhulumeni wakithi kukhona akwenzayo ukusixhasa njengoba siyisiteshi esingenzi inzuzo,” kuphetha uDkt Fakazi.