Kuningi okungacacile ngolwensangu
Kuzothiwani ngalabo ababeka izizathu zezempilio?
UGWAYI WABADALA
NGONDASA (March) 2017, eNkantolo eNkulu yaseWestern Cape, iJaji Dennis Davis likhiphe isinqumo esithi ezinye izigaba zeDrugs and Drug Trafficking Act kazikho emthethweni, zimelene nomthethosisekelo, emuva kokulalela isicelo esifakwe ngummeli wabenkolo yobuRasta, uRas Gareth Prince futhi oyisishoshovu somzabalazo, wokuthi kungabi yicala ukusebenzisa umthunzi wezinkukhu.
Kuleso sicelo, uRas Prince, uthi ukukwenza icala lokhu kuwukunyathela ilungelo lokulingana nesithunzi senkululeko yezenkolo. Ijaji lisilengisile leso sinqumo kuze kube nesiqiniseko seNkantolo yoMthethosisekelo.
Nebala mhla ka-18 kuMandulo (September) nonyaka, iPhini leNhloko YamaJaji uMnu Raymond Zondo, lisethulile isinqumo seNkantolo yoMthethosisekelo esithi ukusetshenziswa komthunzi wezinkukhu ngasese kakulona icala.
Njengoba bekulindelekile, mkhulu umsindo wempikiswano oqubuke emphakathini waseNingizimu Afrika ngalesi sinqumo. Kuningi-ke okungacacile ngemibandela, ukusetshenziswa kwensangu okuzokwenzeka phansi kwayo. Ukuze sikuqonde ngendlela efanayo okungase kube yimithelela yalesi sinqumo, kufanele sibheke isimo ebesikhona kudala, esamanje nesizayo.- Kuhle ukuqala sibheke obekwenzeka endulo maqondana nokusetshenziswa kwensangu futhi okungasisizi ukukubalekela sengathi bekungenzeki. Ngeke siqagele ukuthi bekuyiziphi izizathu nezinhloso zokuba uhulumeni wabamhlophe ukwenze kube yicala ukusebenzisa umthunzi wezinkukhu eNingizimu Afrika. Kuqala umthunzi wezinkukhu wawusetshenziswa phansi kwemibandela ethile, obekwenza kungabi nankinga ngawo:
ngabantu abadala abangabanumzane kuphela abebenelungelo lokuhabula igudu, hhayi injejane yabafana okusafanele yeluse izinkomo zoyise;
ukubhenywa komthunzi wezinkukhu ngegudu bekwenza intuthu yawo idlule emanzini asophondweni ingakafiki kumuntu ukuze kube khona okusalayo ifike ngaphakathi kumuntu isihluzekile;
abadala babeyibhema ingaxutshwe nalutho. Sekuyisikhathi abenkolo yobuRastafari bewusebenzisa umthunzi wezinkukhu ngezizathu zenkolo yabo futhi bekungekho muntu okhonondayo ngokuziphatha kwabo emuva kokuyibhema - nxa kungabantu abayilandela ngokweqiniso le nkolo, kunjalo nje kunendlela yabo yokuziphatha ebingawukhathazi ngalutho umphakathi.
Isishoshovu esinguRas Gareth Prince, sigadla kuzwakale lapho sithi: “Uhulumeni uyakuvumela ukuba uphuze utshwala buze bukubulale futhi ubheme ugwayi uze ube nomdlavuza.
"Kufanele basivumele ukusebenzisa umthunzi wezinkukhu, ilungelo lokulingana libiza lokho, akusiyona indaba kahulumeni ukunquma ukuthi ngidlani noma ngiphuzani." Kuningi okwenza umphakathi udideke ngokuthi sizoba yini isiphetho ngalesi sinqumo, kwazise kunamaphuzu okungacacile ngokwenzeka ngesikhathi sokuchitshiyelwa kwezigaba zomthetho eziphathelene nokusetshenziswa kwezidakamizwa.
Okokuqala wukuthi lesi sinqumo sithi akume ukushushiswa kwabantu ngesikhathi iphalamende lisenza leso sichibiyelo, okungase kuthathe iminyaka emibili ukuba kuphothulwe;
Okwesibili, wumthamo noma yisisindo esivumelekile ukuba ofunyenwe naso abomthetho bangamshushisi;
Okwesithathu nokuthanda ukuba luvindi, wukuthi indawo yangasese iqala kuphi igcine kuphi njengoba isinqumo esethulwe yiJaji Zondo, ngolukakhwini sithi: “The right to privacy is not confined to a home or private dwelling. It will not be a criminal offence for an adult person to use or be in possession of cannabis in private space”. Akucaci lapha noma lokhu kwenzelwa ukuba oyisebenzisayo akwazi ukuyitshala, okuyinto engenakwenzeka endlini. Njengoba sekushiwo, ivutha ubuhanguhangu namanje impikiswano kuzo zonke izigaba zomphakathi ngalesi sinqumo: abomthetho, ezenkolo nabezempilo.
UNgqongqoshe wezamaPhoyisa, uMnu Bheki Cele, ube ngomunye wabakhuza umhlola ngalesi sinqumo seNkantolo yoMthethosisekelo, esho khona ukuthi lokhu kuzokwandisa umthwalo wombutho wamaphoyisa ngoba ukusebenzisa insangu kuyisango lokudlulela kwezinye izidakamizwa.
“Bonke baqala ngensangu, kulandele i- mandrax bese kuba yi- coke (cocaine), okusho ukuthi sonke sisemzileni munye wokungena ezidakamizweni," kusho yena. Sezikhona-ke izehlakalo ezifakazela ukuthi kungani ezinye izigaba emphakathini zinetwetwe ngalesi sinqumo ngoba kukhona asebefikelwa wumqondo othi sezimbiwe yinsele, awushe umthunzi wezinkukhu.
Abazoba sekhaleni lalokho kubonakala kuzoba yibona kanye abangafanelekile ukuba babheme insangu lena. Kungakapholi maseko siphumile lesi sinqumo, sekubikwe ukuthi lena eBloemfontein, abafundi abawu-7 baseNavalsig High School, babhekene necala lokuqondiswa ubugwegwe emuva kokusabalala kwe- video ebaveza behabula wona umthunzi wezinkukhu lona nge-aphula.
UMnu Howard Ndaba okhulumela uMnyango Wezemfundo eFree State, uthe lokhu kwenzeke ngoNhlaba (May) nonyaka futhi njengomnyango kabazange bapholise maseko. Laba bafundi abasemabangeni uGrade 8 noGrade 9 - abafake umfaniswano wesikole - bavela kule video bebambe i-aphula okuchonywe kulona umthunzi wezinkukhu.
Kuthiwa i-aphula lelo linembobo eceleni lapho umfundi nomfundi ebonakala ehabula khona insangu lena. Ngasekupheleni komfanekiso abafundi babonakala sebelidla i-aphula nokunenkolelo yokuthi okade ebhema liyasiza ukuba angezwakali ngephunga. Kuthiwa lesi sigigaba senzeke emagcekeni esikole.
Sibucayi isimo njengoba lokhu kuvele ngesikhathi sokubhala izivivinyo. Khonamanjalo, ePretoria inkampani yamaloli isixoshe abashayeli bayo abawu-300 emuva kokuhlolwa batholwa benenhlese yokusebenzisa umthunzi wezinkukhu.
Umqondisi ophethe kule nkampani, uMnu Arnoux Mare, uthe: “Yebo, ngeshwa bekumele sixoshe emsebenzini abashayeli bethu abawu-300 ngokuhlolwa kutholakale ukuthi basebenzisa insangu, okuphambene nemithetho yokuzophatha." Lesi sinyathelo senzeke emuva kwesinqumo seNkantolo yoMthethosisekelo futhi umthetho okwenza kube yicala ukusebenzisa insangu kawukacinywa.