BAFUNA INKANTOLO ICHITHE ISICELO SE-AFRIFORUM NGOLOMHLABA
IPHALAMENDE lakuleli limemezele izolo ngeSonto ukuthi seliyifakile incwadi efungelwe ephendula isicelo se-AfriForum ukuba libeke eceleni udaba lwalo lokudingidwa kwezomhlaba.
“Kule ncwadi efungelwe, iPhalamende lithole ukuthi i-AfriForum beyizama ukuphazamisa ukusebenza kwalo,” kusho uMnu Moloto Mothapo okhulumela iPhalamende esitatimendeni.
Umbiko owemukelwe yikomidi futhi ozodluliselwa ePhalamende naseMkhandlwini weziFundazwe kazwelonke ukuze bawucubungule, usengowesikhashana ngokufanayo nomthetho-sivivinywa.
UMnu Mothapo uqhube wathi lokhu kuzokube kungesona isiphetho njengoba kungenzeka wamukelwe noma ungamukelwa lo mbiko.
UMnu Kenneth Meshoe ongumholi we-ADCP, uthi uhulumeni ngokunjalo nabantu kabakwazi ukuba ngabanikazi bomhlaba ngesikhathi esisodwa.
“Iphalamende selicele inkantolo ukuba isichithe isicelo se-AfriForum emabhukwini asenkantolo baphinde bakhokhe nezindleko,” kusho yena.
I-Constitutional Review Committee ekuchibiyeleni umthetho u-Section 25 womthetho sisekelo, uqale ukusebenzisa lo mbiko ngale nyanga ngemuva kwezinyanga ithatha imibono yomphakathi, ukuba kuvumeleke ukuba umthetho-sisekelo uvumele ukubuyiswa komhlaba ngaphandle kwesinxephezelo.
I-AfriForum isanda kufaka isicelo eNkantolo eNkulu yaseWestern Cape ukuba lo mbiko iwubeke eceleni. Izakhamizi zakuleli zihambele izigcawu, imihlangano nama- workshop ePhalamende ukuveza eyawo imibono odabeni lokubuyiswa komhlaba ngaphandle kwesinxephezelo.
UMnu Mothapo uthi yize noma umthetho-sivivinywa ungakethulwa, kungenzeka esikhathini esizayo wethulwe uma iphalamende lithatha isinqumo, ngaphambi kwalokho, uthi kuyodingeka ukuba liphinde limeme amalungu omphakathi ukuba azoveza eyawo imizwa ngalolu daba.
Izolo, uMnu Mothapo uthi ngokwe-AfriForum, beyifuna ukuphoqa iphalamende ukuthi ungemukelwa lo mbiko ngoba unezinsolo zokuthi kufanele ngabe ikomidi lizibhekile izincomo zayo (i-AfriForum).
“Ikomidi kazikho izincomo elingazibhekanga ngaphandle kwalezo ebezingahambisani nalolu daba njengalezo ebezibuza imibuzo ethile engahambisani nalolu daba,” kusho uMnu Mothapo.
Ekuqaleni kwaleli sonto, i-CEO ye-AfriForum, uMnu Kallie Kriel, ithe inethemba lokuthi iphalamende ngeke liqhubeke nokwamukela lo mbiko.
“Izinkulungwane zezincomo zamalungu ethu zizitshiwe,” kusho yena.