Uzogaba ngosaziwayo oweNdoni kulo nyaka
Kulindeleke nongqongqoshe
KULINDELEKE ongqongqoshe bakazwelonke emcimbini weNdoni Miss South Africa wakulo nyaka ozokuba se-ICC eThekwini mhla ka-15 kuZibandlela (December). Ngokusho kwabagqugquzeli balo mcimbi, bathi izintokazi eziyingxenye yalo mncintiswano weNdoni okuhloswe ngawo ukugqugquzela ukuziphatha kahle, zizophelezelwa ngondunankulu bezifundazwe eziqhamuka kuzona abazokube bezozibonela ubuhle bokuqhakanjiswa kwesintu. UMsunguli weNdoni, uDkt Nomcebo Mthembu, uthe yingakho lo mcimbi uhlelelwe ukuba wandulelwe wumbukiso womgidi wamasiko ukuze zonke izifundazwe zizothekelisana ngolwazi ngokwenqubo yazo. “Imiviliyelo ezokwenzeka mhla ka-14 kuZibandlela yazo zonke izinhlanga ngokwamasiko azo, nayo izobamba iqhaza elikhulu ekubumbeni iNingizimu Afrika nasekuhlanganiseni izinhlanga ezahlukene. “Kuzoviliyelwa emini bese kuthi ntambama kuqale idili lo-mgidi. Sizokwamukela nabezokuvakasha eThekwini ukuze bezobuka ubuhle bento yesintu,” kusho uDkt Mthembu.
Izintokazi eziqhudelanayo zingu-12 njengokwahlukana kwezinhlanga nangokwezifu-ndazwe kanti ephume phambili kuzona izoklonyeliswa ngemali yomfundaze,” kusho uDkt Mthembu.
Lo mncintiswano wokukhetha unobuhle wesintu wakuleli, uqalwe eminyakeni edlule ngenhloso yokugqugquzela ukuziphatha kahle kubantu besifazane nokufundisa ukubaluleka kwamasiko. Okunye obekuseqhulwini wukuyalwa kwamantombazane ngokubaluleka kwemfundo.
Osaziwayo abehlukene bemidlalo kamabonakude okubalwa aboZalo neMbewu, bazokube beyingxenye yomcimbi.
INdoni isizakhele igama elihle ngokukhathalela ukuthuthukiswa kwentsha ngolwazi ikakhulukazi kwezamasiko njengoba abafana namantombazane bethathwa bayohlaliswa kwesinye sezifundazwe beyoqeqeshwa.
Kuzoviliyelwa emini bese kuthi ntambama kuqale idili lomgidi...