Ubumnandi bebubuzwa eNsimbini Lifestyle
NJENGOBA bekuyimpelasonto yemicimbi emikhulu eThekwini, iTelkom Knock-out ebiseMoses Mabhida namaCrown Gospel Award abese-ICC izolo, nezindawo ezincane azisalanga ngaphandle ukujabulisa abantu.
NgoLwesihlanu abathandi bobumnandi bathutheleke eNsimbini Lifestyle, eMbumbulu, beyobhiyoza emcimbini obizwa nge “The beat goes on” lapho bekudlala khona uDJ Tira, DJ Naves noSphectacula noDJ bendawo.
UDJ Tira ungene ngehora leshumi nambili ebusuku wadlala yedwa kuthe ngemuva kwesikhathi kwangena abadansi base-Afro bamphelezela. Kuthe eseyoqeda wajoyinwa nguSpecthacula noBeast badlala ingoma edume kakhulu kulezi zinsuku ethi, “Bhampa”.
Le ngoma inezinhlamvu ezikhonzwe kakhulu ezithi, “Bhampa phezu kwelokhuza, akekho ozokhu- za”.
Noma izulu belilokhu likhemezela kodwa abantu abaphelanga umoya, bebedansa beshutha nezithombe ngamaselula abo.
UDJ Tira ukhumbuze abantu ngomcimbi wakhe omkhulu obizwa ngeFact: Durban Rocks oba minyaka yonke kuleli dolobha.
Ngemuva kukaTira kube sekungena uDJ Lee obingelele ngengoma kaVusi Nova eshisa izikhotha njengamanje ethi, “Asiphelelanga” kwavele kwachwaza.