BEZIBUYA EMALOKISHINI ASETHEKWINI
NGEMUVA komdlalo weTelkom Knock-Out obuseMoses Mabhida ngempelasonto, abathandi bobumnandi banikele ezindaweni ezahlukene ukuyozijabulisa.
Iningi lithutheleke eMashamplanes, eChersterville, Artizen KwaMashu, Eyadini nakwaMax, eMlazi, ukubala ezimbalwa nje.
Abanye bavele bavula amagazibho abo badonsa amalahle bazosela inyama eduze kwakhona eMabhida.
EMashampanes abantu bajatshuliswe nguZakes Bantwini obedijeya, ubona ukuthi lento ayenzayo uyizwa ngaphakathi.
UBonga, ongumnikazi wale ndawo, ubonge kakhulu ngokwesekwa abakuthola kuMasipala weTheku ngokugqugquzela abavakashi ukuthi uma beseThekwini bazivakashele lezi zindawo ezisemalokishini.
Emini, khona eMashamplanes, bekukhona uCassper Nyovest ezokhumbuza abantu ngomcimbi wakhe omkhulu ozoba ngesonto elizayo, i“Fill up Mabhida”.
UZiyasha ukhulume noNtombifuthi Masango waseSoweto, eGoli, obevakashe eThekwini, nothe iTheku lishaye izinyoni ezimbili ngetshe elilodwa njengoba lisingathe iTelkom namaCrown Gospel Awards ngempelasonto eyodwa.
Ubelokhu ebabaze ubumnandi beTheku.