OWE-PIRATES AKAFUNI UKWENZA IPHUTHA LE-BAFANA NGE-SEYCHELLES
UMQEQESHI we-Orlando Pirates akafuni ukwenza iphutha elenziwe yiqembu lesizwe lakuleli iBafana Bafana njengoba ezakhe ziqala umshikashika wemidlalo yeCaf Champions League.
IBucs izovula le midlalo neLight Stars yaseSeychelles ngoLwesithathu ngo-19h00 e-Orlando Stadium, eSoweto.
Iya kulo mdlalo nje ihambela phezulu njengoba iwashise omkhaya bayo ijezi ibahlula ngo-21 kwi- semi final yeTelkom Knockout ngoMgqibelo ntambama eMoses Mabhida Stadium, eThekwini.
UMilutin “Micho” Sredojevic ololonga iBucs uthi abakwenze kwiChiefs sekungumlando.
“Siqala esinye isahluko manje, sivula imidlalo yeCaf Champions League ngakho-ke kufanele siqale sitadishe kahle izimbangi zethu ngoba asazi lutho ngazo.
Asifuni ukwenza iphutha elenziwe yiBafana ebukele phansi iSeychelles ngoba ingenamlando ebholeni yathola iphuzu kuyona ekuhambeni kowokuhlungela i-Africa Cup of Nations.
Ngeke nangengozi siyibukele phansi le kilabhu siyokwenza ucwaningo ngayo ngoba asifuni ukuba sengozini zisuka nje, sifuna ukungena kweyamaqoqo,” kusho uSredojevic.
Komunye umdlalo weCaf Champions League, iMamelodi Sundowns izobhekana neLeones Vegetaranios yase-Equatorial Guinea kusasa ngoLwesibili ngo20h00 ekuhambeni.
IDowns ibhekise amabombo kuleliya lizwe ngeledlule ngenhloso yokujwayela umoya wakhona.
UPitso “Jingles” Mosimane ololonga iDowns ugcwele ukuzethemba njengoba ekholwa wukuthi bazobuya newini ekuhambeni.
KoweCaf Confederations Cup, iKaizer Chiefs izobhekana neZimamo yaseTanzania ngoLwesithathu ngo-19h30 eNelson Mandela Bay Stadium, eBhayi.
UGoivanni Solinas ololonga iChiefs uthi lo mdlalo kufanele noma kanjani bawunqobe ukuze babuyise ukuzethemba.
IFree State Stars yona izobhekana neMukura Victory Sports FC yaseRwanda ngoLwesithathu ngo20h00 koweCaf Confederation Cup kulo leliya lizwe.