IQEMBU LIKANCWANE LINQOBE EYAMA-CROWN

Ilanga - - Front Page - NONHLAKANIPHO SHINGA noJOHN HLONGWA

UBONGE abathandi bomculo wokholo baseNingizimu Afrika ngokungabalahli emuva kokushona komyeni wakhe (uSfiso) u-Ayanda Ncwane (osesithombeni), obekuthi akandize Abathandwa behlabana ngendondo ye- video evelele.

Leli qembu, elingaphansi kwakhe, lidume ngengoma ethi “Umoya Wami Uyavuma”. Liphinde lakhombisa abaningi ukuthi nasemculweni wokholo kakulona ihlazo ukushaya imidanso yesimanje.

Leli qembu ligcine seli- trender nasezinkundleni zokuxhumana njengoba abaningi bebenza ama- video, beshaya imidanso yalo njengoba lize lishaye ne’vosho’. Bebewenza bese bewafaka ezinkundleni zokuxhumana. Ngisho nosaziwayo bakuleli bagcine bethatheka, beyenza le midanso, baziqophe ama- video bawafake kuzona izinkundla zokuxhumana.

Abathandwa bangabanye babaculi abahlabane emcimbini weSABC Crown Gospel Music Awards obuse-ICC, eThekwini, izolo kusihlwa. Ama-Crown, njengoba aziwa kanjalo, abegubha unyaka ka-11 asungulwa kanti abedlisa ngengqikithi ethi, Next Level, njengoba abasunguli bawo bebethi asekwelinye izinga manje.

UHlengiwe Mhlaba uhlabane ngendondo yeClassic of All Time ngengoma yakhe ethi “Ziyamazi Umelusi”, kwathi uNqubeko Mbatha wazuza eye-Best Gospel Producer nge-albhamu ethi “The Next Revival”.

Intokazi yaselokishini laKwaMashu, uSwazi Dlamini, ihlabane ngeye-Best Female Gospel Artist, kwathi uSipho Ngwenya wahlabana ngeye-Best Male Gospel Artist. Iqembu lesicathamiya Ithimba Le Afrika lihlabane ngeye-Best Gospel Acapella ngengoma ethi “Sesiphunyukile”.

Emkhakheni wabasanda kufika kowokholo, i-Best Newcomer, kuhlabane kuwona ababili uLebohang Kgapola noGugulethu Nkutha kanti kowe-Best Gospel Album kunqobe uSicelo Moyya nge-albhamu yakhe ethi “Solid Rock”.

Umfundisi Vusi Gama uhlonishwe ngeCrown Lifetime Award, kwathi iqembu likamasikandi Amageza Amahle lahlabana ngeyeBest Gospel Maskandi.

Newspapers in Zulu

Newspapers from South Africa

© PressReader. All rights reserved.