Aphikisayo ashaya amakhala
Afuna incazelo ngo-R3m osetshenziswe emcimbini obusebhishi
ISAWUSOLA umgqakazo emaqenjini aphikisayo kuMasipala weTheku njengoba ethi namanje akukacaci ukuthi u-R3 million osetshenziswe ukuhlela indawo yokubuka i- semi final yeTelkom Knockout phakathi kweKaizer Chiefs ne-Orlando Pirates ebhishi, usebenze kanjani.
Lo mdlalo ubungoMgqibelo eMoses Mabhida Stadium, iChiefs iguqe ngo-2-1, okwenze iBucs yawelela kowamanqamu ezowugijima neBaroka FC eNelson Mandela Bay Stadium, e-Eastern Cape.
Ngeledlule umasipala uhlele indawo lapho bekunobhazabhaza kamabonakude ebhishi, okutheleke izinkumbi zabantu ukuyobuka lo mdlalo.
Ngaphambi komdlalo, amaqembu aphikisayo kulo masipala, okuyiDA ne-IFP, azwakalise ukukhathazeka ngemali ebizokhishwa ukuxhasa izindawo zobumnandi zasemalokishini nebizosetshenziswa ebhishi ukufaka lo bhazabhaza nesiteji.
Akhale ngokuthi kufinyelelwe kanjani ku-R3 million obuzosetshenziswa ebhishi njengoba izindawo zasemalokishini kuvele ukuthi zinikezwe u-R200 000 ngayinye.
UMnu Mdu Nkosi, we-IFP kuMasipala weTheku, utshele ILANGA ukuthi izikhulu zalo masipala zehlulekile ukuchaza ukuthi isebe- nze kanjani le mali.
“Sekucacile ukuthi kuningi esifihlelwa khona ngale mali, yingakho sesikhethe ukubhalela imenenja kamasipala (uMnu Sipho Nzuza) ukuze isiphendule njengoba kuyiyona ebhekelela ukusebenza kwemali. Uma singazitholi izimpendulo, sizodlulela emnyangweni wezokubusa ngokubambisana‚” kusho uMnu Nkosi.
Ukhale ngokuthi sekukaningi bebhalela uMnu Nzuza izincwadi ngendlela okuqhutshwa ngayo izinto kulo masipala, kodwa lutho izimpendulo.
UNkk Nicole Grahams weDA, naye ukhale esifanayo noMnu Nkosi.
“Uma sigcina singazitholi izimpendulo eziqondile ngokusebenza kwale mali, ngeke sinanaze, sizobhalela uMvikeli woMphakathi (Adv Busisiwe Mkhwebane) ngoba yimali yabakhokhi bentela emoshiwe,” kusho yena.
UMnu Philip Sithole, oyisikhulu esiphezulu kulo masipala, uthe kusempondo zankomo ukuthi kungakhulunywa ngemali esetshenzisiwe emcimbini wasebhishi njengoba izinkampani ezisebenzile kusamele zithumele amainvoice.
“Okwamanje akukho esizokuphawula ngoba umasipala kawukayikhiphi imali mayelana nalo mcimbi. Akulula ukusho ukuthi yimalini ngempela esigcine siyikhiphile ngalo mcimbi,” kusho uMnu Sithole.
Uthe kuyoze kucace ngonyaka ozayo ukuthi kugcine kusebenze malini. Emuva kokubuka lo mdlalo, abantu abebesebhishi bazitike ngobumnandi kunandisa abaculi noDJ.