Luya kubantu olukaRobert Marawa
Luzobe lunongwe ngobumnandi
LUTHATHE elinye igxathu uhlelo lwezemidlalo lwakwaSABC, olushayelwa nguRobert Marawa, iMarawa Sports Worlwide Show, njengoba luzosakazelwa ezindaweni ezahlukene njalo ngoLwesihlanu, yize le nkampani idonsa kanzima emalini.
Lokhu kudla imali uma kuqhathaniswa nokujwayelekile, uma kusakazelwa estudiyo. Lolu hlelo lukaMarawa luzwakala kwiRadio 2000 nakwiMetro FM ngesikhathi esifanayo, kusukela ngo-18h00, luhanjelwa ngamaqhawe asemnkantshubomvu, amanye asathatha umhlalaphansi kwezemidlalo emikhakheni ehlukene, kubuyekezwa nezamzukwana. KwiMetro FM luyaphela ngo-19h00 kodwa luqhubeke kwiRadio 2000 kuze kushaye u-20h00.
Kule mizungezo kuzobe kungasakazwa nje kuphela, lolu hlelo luzobe luphelezelwa yintokozo, kunabaculi noDJ. UMarawa yisilomo sale nhlangano okube nezinkulumo sesibuyiswa njengoba sike sachithwa kwiMetro FM phambilini.
Izinkulumo bezisuswa wukuthi ukubuya kwakhe bekuhambisana nenkontileka ebinemibandela yezigidi zamarandi. Abahleli bale mizungezo, okungabenkampani iJust Sports, bathi yibo abaqhamuke nalo mbono abazoyizingelela bona abaxhasi uma libhoboka elabo iphakethe - okungeke kusenge iSABC njengoba kubonwa ngokusa kuyo emalini.
Izethameli zizoba nethuba eliyingqayizivele lokuba yingxenye yalolu hlelo oluhlonishwayo kwezemidlalo. Ngokwezinhlelo, luyaqala eMax's Lifestyle eMlazi, kusasa ngoLwesihlanu, lapho kuzobe kumenywe isilomo esagqama kwi-Orlando Pirates, uPatson “Sparks” Banda.
Amathikithi alezi zinhlelo, angemaningi kangako, aseyatholakala e- computicket. Kwabazonandisa ngalolu suku kubalwa uBusiswa owenza izimanga kwi-gqom esteji, uDJ Bongz noNzwiri.
Ezinye izindawo ezisaqinisekisiwe yiKopano Lounge & Shisanyama mhla ka-21 kuZibandlela (December) eMthatha, e-Eastern Cape, yiMbombela eMpumalanga mhla ka-1 kuNdasa (March) 2019, oNdini mhla ka-29 kuNdasa nasePhokeng, eNorth West mhla ka-6 kuMandulo (September) 2019 okusazoqinisekiswa izizinda okuzosakazelwa kuzo.
AbeJust Sports bathi njengoba kusenezikhala ezingaka, bazozigcwalisa uma iphakethe livuma.
Okhulumela iSABC, uNeo Momodu, ugcine engawuphendulanga umbuzo wokuthi ukukhishwa kwalolu hlelo ngeke yini kuqhubezele izinkinga zemali ezibhekene neSABC, nakuba ebethembisile ngomlomo kaVuyo Mthembu osebenza naye ehhovisi lezokuxhumana. Nezindawo ezizovakashelwa ugcine engaziqinisekisanga.