Kuboshwe inkosikazi

Indoda yabulawa ingena emzini wayo

UKHALELWE ngamasongo kaSigonyela nomzala wakhe owesifazane waseNgwelezane, eMpangeni, ngezinsolo zokubulala umyeni wakhe.

UNkk Zibuyile Mkhize (39) uboshwe nomzala wakhe, uMnu Lindokuhle Khumalo (35), ngokufa kukaMnu Senzo Mkhize (51), odutshulwe wabulawa ngoNcwaba (August) engena egaraji lakwakhe.

Kuthiwa ngosuku uMnu Mkhize abulawe ngalo uMnu Khumalo ubekhona egcekeni, evakashele umzala wakhe.

Ngokuthola kweLANGA ngo- mthombo walo, kusolwa ukuthi uMnu Khumalo usize uNkk Mkhize ngokumtholela inkabi ezomenzela umsebenzi.

Uthi umufi ufike kwakhe ephuma emsebenzini, wangena ngemoto yakhe egaraji, kanti umbulali usevele umlinde ngaphakathi egaraji.

Kuthiwa kwaba wukwehla nje emotweni, umsolwa wamdubula qede washaya wachitha ngemoto yakhe (umsolwa), wangathatha lutho kuyena.

Imoto kamsolwa itholakale ngemuva kosuku ipakwe emgwaqweni, kungekho muntu phakathi futhi ingacwiyiwe.

Umthombo uthi uMnu Mkhize ubulawa nje, isimo besivele si- ngesihle phakathi kwakhe nomkakhe.

“Bebehlala endlini eyodwa isimo simuncu, bengakhulumisani. Kuthiwa ukungezwani kwabo kuhlobene nezinkinga zemali. Bese kunesikhathi eside umshado wabo ungahambi kahle,” kusho umthombo.

Okhulumela amaphoyisa KwaZulu-Natal, uCapt Nqobile Gwala, ukuqinisekisile ukuboshwa kukaNkk Mkhize noMnu Khumalo kanti bavelile eNkantolo yeMantshi yaseMpangeni, ngoMsombuluko, ngecala lokubulala.

Uthi baphinde bavela izolo ngoLwesithathu ukuyofaka isicelo sebheyili, icala labo lahlehla.