UMjiks udalule ayekufihlile ngempilo yakhe

I-albhamu yakhe igalela ezitheni zakhe

Ilanga - - Izindaba - MTHOBISI SITHOLE [email protected]

USHIYE ecacisile ngobudlelwano bakhe nabaculi abephila nabo uSbongiseni “Mjikijelwa” Ngubane, iChalaha likaShafuza (ongasekho), obesebuphelelwe yisikhathi.

Lokhu kuzozwakala kwi-albhamu kaMjikijelwa - oshone ngoNhlaba (May) nonyaka - ethi‚ “Buphelile Ubungani” ezophuma ngoMgqibelo.

Leli ciko lishona nje, besezivele zikhona izinkulumo ezithi akasancindi dengezini lunye noMthandeni “iGcokama Elisha” Manqele, okuvela ukuthi yikho okuholele ekubeni angamukeleki kubo kaMjikijelwa ngesikhathi eyolila ngesikhathi edlule emhlabeni.

Induna yabalandeli bakaMjikijelwa, uMnu Qhoshakufanele “Soh” Mkhonza, utshele ILANGA ukuthi le albhamu kaMjikijelwa uyifanisa nesiprofetho ngoba ubungani bakhe nabathile abebemhlukumeza emculweni, buphelile.

“Kuningi obekumhlukumeza ekuvalele ngaphakathi, bese kufike ekugcineni, esekukhiphela izwe. Le ndoda ihambe emhlabeni idinwe kabi. Abantu bazowuthokozela umsebenzi oshiywe yiChalaha, kuyimanje ama-oda angena usuku nosuku.

“Okuzotholakala kwi-albhamu yilokhu okwenziwe nguyena. Kuke kwaba nempikiswano abanye bethi makuhlungwe izinkulumo ezithile ezikule albhamu kodwa sagcina sivumelana ngokuthi makuphume lokhu obekuyisifiso sakhe ngoba nesihloko sealbhamu ushiye esiqambile,” kusho uMnu Mkhonza.

Le albhamu kaMjikijelwa izokwethulwa ngokusemthethweni ngoMgqibelo idayiswe yizinduna zabalandeli bakhe eWorkshop, eThekwini nakwaMaiMai, eGoli, ngalo lolu suku.

Bekumele iphume ngePhasika lanonyaka kodwa uMjikijelwa waxinwa wukugula, kwagcina kumenele.

Iqukethe izingoma okubalwa kuzona ethi, “Umuntu akabongi‚ “Nithi Anizwani‚” “Dlana Mshefane Ushiyele uGundi‚” “Ihlo Lalomuntu‚” nethi “Imikhovu Emibili”.

Umculo kaMjikijelwa kawuphelile njengoba uqhutshwa ngumfowabo omncane uBheki onikezwe iqembu laleli ciko, Amangcukumane.

ISITHOMBE: SITHUNYELWE

USHIYE ecacise kwi-albhamu ngokuphela kobudlelwano bakhe nabaculi abedlelana nabo uMjikijelwa.

Newspapers in Zulu

Newspapers from South Africa

© PressReader. All rights reserved.