Kumiswe uthishanhloko 'ngokwehlulwa wukuphatha' isikole
Abafundi baba wuvanzi ngesikhathi sokufunda
KUNOVALO ngomlando omuhle weVelangaye High School, yaseNkandla, eyaziwayo ngemiphumela emihle kumatikuletsheni njengoba kubikwa izinkinga eziholele ekubeni kumiswe uthishanhloko wakhona.
Kubikwa ukuthi uthishanhloko umisiwe mayelana nezinsolo zokwehluleka wukuphatha isikole, okuvela ukuthi kasisalawuleki emuva kokunikwa sona eminyakeni emithathu edlule ngesikhathi kuhamba uDkt Ngogi Mahaye obesiphethe.
Kubikwa ukuthi kunamariphothi ezingane obekutholakala ukuthi anemiphumela okungeyona, uthishanhloko ahlulekile wukuphendula ngayo kubahloli.
Kubikwa ukuthi ngaso sonke isikhathi uma kade kufika izikhulu zomnyango wezemfundo zifuna umsebenzi, beziwuthola ungekho esimeni esilindelekile.
“Kwakuyisikole esiphathekayo eminyakeni edlule, selokhu kuhambe obephethe njengothishanhloko phambilini, kunoshintsho olukhulu.
"Abahloli bammisile ngoba bebona ukuthi isikole silengela eweni,” kusho umthombo.
Omunye umthombo ongaphakathi, uthe awekho amacala abucayi kodwa kubhekwe izizathu ezincane azokhishwa ngazo uthishanhloko.
"Isikole singaphezu kwamandla akhe, izingane ziyamehlula, zigcwala idolobha ngesikhathi sokufunda,” kusho umthombo.
Ilungu lesigungu esilawula isikole, uMnu Mthokozi Biyela, litshele leli phephandaba ukuthi banethemba lokuthi abafundi bazophasa nakuba uthishanhloko engekho esikoleni.
“Ngeke ngikhulume ngezindaba zesikole ngoba sinezinhloso ezinhle ngaso, kasikwazi ukusihlambalaza, kodwa sikwamukelile esitshelwe khona wumnyango wezemfundo,” kusho uMnu Biyela.
Okhulumela uMnyango wezeMfundo KwaZulu-Natal, uMnu Kwazi Mthethwa, uthe kuyiqiniso ukuthi uthishanhloko bammisile ngoba uyaphenywa ngamacala abhekene nawo.
"Umbiko ophelele sizowudedela uma sekuphothulwe uphenyo. Siyakuqinisekisa ukuthi uthishanhloko akekho esikoleni,” kusho uMnu Mthethwa.
UDkt Mahaye ushiye kulesi sikole ngoba eseqashwe ehhovisini likaNgqongqoshe wezeMfundo KwaZulu-Natal.
Ngaleso sikhathi umnyango ubusaholwa nguNkk Peggy Nkonyeni engungqongqoshe. Manje uDkt Mahaye usengumqondisi omkhulu ehhovisini likangqongqoshe okhona njengamanje, uMnu Mthandeni Dlungwana.
IVelangaye izakhele igama ngokukhiqiza imiphumela emihle kamatikuletsheni, iqhudelana neBizimali High school, yakhona eNkandla.