Kwethulwe indlela entsha yokukhokha
Bathi lendlela izovikela abathengi
ISALOKHU iqhubeka nokubonakala intuthuko emkhakheni wezokubhanga ( banking sector) njengoba ibhange iFNB seliphinde lethula olunye uhlelo olusha lokubhanga.
NgoLwesibili leli bhange limemezele ukuthi sekunemishini esebenzisa ubuchwepheshe obusha sha, engezodinga ukuba abathengi baze bafake ikhadi phakathi emshinini uma bekhipha imali.
Leli bhange lithi umthengi uzovele athintise ( tap) ndawana thile emshinini ikhadi leli elibizwa ngecontactless, bese efaka inombolo eyimfihlo (Tap and Pin). Ngokusho kweFNB, le mishini enobuchwepheshe obusha izonciphisa isikhathi abathengi abasichitha emshinini bekhipha imali. Kwi- transaction ngayinye isikhathi esichithwa ngumthengi emshinini ekhipha imali sizoncipha ngo-20 seconds. Ngaphezu kwalokho leli bhange lithi abathengi bazovikeleka ebugebengwini obudlangile bokuntshontshwa kwemininingwane yamakhadi okwenziwa yizigebengu ezisebenzisa imishini emincane engekho emthethweni ebizwa ngokuthi yi- card skimming device, eziyifaka emishinini yokukhipha imali.
UMnu Raj Makanjee oyi-CEO yeFNB Retail uthi ukwethulwa kwalobu buchwepheshe kuyigxathu eisemqoka ezinhlelweni zebhange zokuthuthukisa ukuphepha nokwenza ukubhanga kube lula.
Njengamanje ingu-100 imishini ekwazi ukusebenzisa lolu hlelo olusha. Eminye kubikwa ukuthi izothuthukiswa ngonyaka ozayo ukuze ikwazi ukulusebenzisa.
Ngokusho kukaMnu Makanjee, leli bhange liqale ukukhipha uhlobo lwamakhadi olubizwa nge- contactless eminyakeni emithathu edlule kanti njengamanje linalolu hlobo lwamakhadi asevele ese-tshenziswa ngabathengi angu-8,5 million, kuhlanganisa kuwo ama- debit nama- credit card.