Akavumanga iphupho lakhe lishabalale
THANDO, ukuzinikela nokuba nomuntu othile oyisibonelo yikho okugcine kwenza uMsizeni Mngadi angene emkhakheni wezobunjiniyela bemikhumbi (Marine Engineering).
Uthi ukubona impilo emnandi eyayiphilwa ngumfowabo kamngani wakhe owabe enza lo msebenzi yamhalisa futhi yamgqugquzela.
“Ukuba ngangingenaye umuntu oyisibonelo eduze kwami kangikholwa ukuthi ngabe ngangena kulo mkhakha. Ngangihlezi ngibuka umfowabo kamngani wami evakashela izindawo ezihlukene futhi ngibona nokuthi imali ikhona,” kuchaza yena.
UMngadi wasoPhokweni, eMkhambathini uqashwe yinkampani enkulu eNingizimu Afrika engaphansi kukahulumeni iTransnet. Uchaza umsebenzi awenzayo njengofanayo neminye ngoba yonke imisebenzi inezingqinamba zakhona.
“Noma yimuphi umkhakha unobunzima bakho, kodwa-ke ngiye ngithi njengoba thina sikwazile ukuba sidlule nakanjani nabalandela ngemuva bazokwazi. Kuba nenkinga yokuxhumana ngolimi kwazise sisebenza nezinhlanga ezahlukene kodwa kuhamba isikhathi kugcine sekujwayelekile.
Okunye wukuthi kuhanjwa isikhathi eside kakhulu, akafuneki umuntu ozobuye ateteme athi ufuna ukubuyela ekhaya ngoba kusuke kune- contract esuke isayiniwe ngesikhathi uhamba.”
UMngadi uthi umsebenzi wakhe wonke ugxile emkhunjini. “Sibhekelela ukusebenza komkhumbi ukuthi kuhamba kahle, izinjini zisebenza kahle yini nokunye okuningi.
“Maningi kakhulu amathuba omsebenzi uma ungene kulo mkhakha kodwa kumele uqaphele ukuthi usesikhungweni okuyiso yini esibhaliswe ngaphansi kweSA Maritime Safety Authority,” echaza.
Uthi ngokolwazi analo zimbili izikhungo okwazi ukuba uthole kuzo lezi ziqu okuyiDurban University of Technology neCape Peninsula University of Technology. Kanti izifundo okudingeka uziphase kahle esikoleni uma ufuna ukungena kulo mkhakha yiMaths, Physics ne-English.
Uthi okumthokozisa kakhulu ngomsebenzi wakhe wukuthola ithuba lokuvakashela amazwe ehlukene, ukwazana nabanye abantu nokwazi indlela okuphilwa ngayo kwamanye amazwe.
Phakathi kwamazwe aseke avakashela kuwo ubala iMexico, iSpain, iTurkey, iRussia namanye amaningi.
UMngadi akagabile ngeziqu zeMarine Engineering kuphela kodwa wafundela ne-Electrical Engineering ( heavy current) kodwa ngenxa yokungawutholi umsebenzi oqondene nalezo ziqu wagcina esenguthisha ofundisa iPhysics neMaths emabangeni aphezulu.
“Ngenxa yokuthi bengizwa ukuthi lo mkhakha awukho ngaphakathi kimina, bengilokhu ngiqhubeka ngicwaninga ngokungena kwi- marine. Ngenhlanhla ngagcina sengifundile iminyaka ewu-4 njengoba sengisebenza manje,” kuphetha yena.
Maningi kakhulu amathuba omsebenzi uma ungene kulo mkhakha...