GALAKAJANA:
IBANYANA Banyana nebhola labesifazane lonkana bangaba nesasasa elikhulu kabi, inqobo nje uma kungadlala lezi zintokazi ezizithandayo, ezinezinwele nezinzipho ezithengwa phesheya kwezilwandle.
Akusho mina, kodwa ngitshelwe ngenye yama- yellow bone abephuza imali yami kwelinye lamahhotela aphambili kuleli.
Ningaqali ningibize nge- blesser ningakaluzwa lonke udaba. Phela benginomcimbi wokuthengisa imidwebo yami, lapho bekugcwele khona izicukuthwane ezinemali engasukumi phansi.
Izintokazi lezi bezimenywe yinkampani ebengiyiqashile ukuba ihlanganise lolu suku obelubalulekile kimi.
Lo dade, ophethe le nkampani, ungitshele ukuthi umcimbi osezingeni eliphezulu kumele ugcwale iziphalaphala, lokhu abakhulumi besiNgisi abathi phecelezi “eye candy”.
Bengingubani-ke mina ebengizophikisa umuntu osebenza ngemicimbi futhi onesipiliyoni?
Kuthiwa abantu - ikakhulukazi abesilisa - abanemali bayathanda ukunonisa iso nje noma bengeke badle.
Njengomiste phathi, ngiphoqelekile-ke ukuba ngihambahambe ngizula indlu yonke, ngikhulume nazo zonke izivakashi zami ukuze phela ngizenze zizizwe zamukelekile. Cha, ngiyijikeleze yonke indlu ngikhuluma isiNgisi esikhulu, o- because, of course no- intercourse.
Ngithe sengizwa ukuthi izicathulo zami ezintsha seziyangishisa, ngathola itafula ngahlala phansi nengilazi yami kagologo, ngizama ukudambisa iminjunju ezinzwanini.
Ngithe ngisahleli kanjalo, kwafika iziphalaphala ezintathu nazo zathi voshosho lapha eduze kwami. Bezigqoke kahle, futhi zifake izinwele zokufakelwa lezi ezibiza amatawuzeni okuthiwa amaBrazilian weave, kanti nezinzipho ngokunjalo bezizinde okwezekati futhi zimbalabala, ubungafunga ukuthi zipendwe ngabadwebi abaseqophelweni eliphezulu, wena owabona oPicasso noVan Gogh.
Siqale ngokuxoxa ngemidwebo yami, kodwa ngabona nje ukuthi le ngxoxo ibaphathisa ngesithu- kuthezi.
Sibe sesixoxa ngebhola, ngoba phela i-Orlando Pirates ibiqeda ukubhaxabula iKaizer Chiefs okwesibili imidlalo ilandelana.
Phela akekho umuntu ongawazi la maqembu amabili, ngisho nabangalilandeli ibhola imbala, bawazi kahle. Ngibe sengiyabuza ukuthi njengoba iBanyana Banya- na idlala ibhola elisezingeni eledlula eleBafana Bafana, kungani abesifazane bengayi ezinkundleni beyoxhasa ozakwabo.
Phela iBanyana Banyana kayisawashayi amanye amaqembu ungafunga ukuthi seyiyabukisa, kanti ingayithatha nokuyithatha nje nale ndebe yase-Afrika, eyidlalelayo njengamanje.
Inkinga enkulu wukuthi abalandeli bebhola kabayi ezinkundleni, kusukela kwathi nhlo.
Ibhola labesifazane kalinabo abalandeli njengelamadoda. Linjalo nje kalixhaswa ngemali ngenxa yokuthi amaqembu alo kawakwazi ukugcwalisa izinkundla. Axhaswe yinkampani kaphethilomu, iSasol, nje kuphela.
Phela izinkampani zifuna ukubona izinqe ezihlalweni. Enye yalezi zintokazi iphendule yathi abantu baya lapho kunento abayithandayo khona noma ebajabulisayo.
“Abalandeli besifazane abaningi baya ukuyobukela ibhola lamadoda ngoba befuna ukuzibonela ama- hunk. Mina nje ngeke ungibone ngiyobukela abanye abafazi, ngifuna ukubona amadoda,” kusho le ntokazi ogama layo ngicabanga ukuthi bathe nguNkawana.
Iqhubeke yathi uma abadlali beBanyana Banyana befuna aba- landeli, kumele baqale ukuzimotonga, bafake izinzipho nazo lezi zinwele zokufakelwa.
“Kumele babe hot. Uyasibona thina ukuthi si- hot kanjani? Iyiphi indoda engeke yafisa ukuzosibukela?” esho egigitheka uNkawana.
“E-Brazil ibhola labesifazane linabalandeli ngoba abadlali bakhona basaziphatha njengabafazi, basho ngezinwele ezinhle futhi bami kahle, ba- hot,” sekujobelela omunye othe igama lakhe nguPalesa.
Kumele samukele kodwa ukuthi ibhola labesifazane lisafufusa, mhlawumbe ngokuhamba kwesikhathi lizozakhela nalo abalandeli.
Enye insizwa ethe yagaxeka nje njengenyama yomsipha singayimemanga, ithe ibhola labesifazane kalijwayeleki.
“Nakhu nakwi- rugby sesize sajwayela ukubona abantu abamnyama bedlala, kusaqala bebengabaningi ababukela lo mdlalo njengoba ubungowabelungu.
“Uma iBanyana Banyana ingadlalelwa ngamapatshazi afana nani, siyogcwalisa izinkundla zize ziphuphume,” esho lo mlisa ebuka labo sisi engihleli nabo, emoyizela njengokalakateni ubona iqatha lenyama.
Uyasibona si-hot kanjani? Iyiphi indoda engeke ifune ukuzosibukela?