Kumapeketwane kwiKings
Abadlali bakhala ngokuxoshwa ngokungemthetho
SIMAPEKETWANE isimo kwiReal Kings FC egijima kwiNational First Division (NFD) njengoba kuvela ukuthi kunabadlali ababopha le kilabhu bekhala ngokuxoshwa ngendlela engekho emthethweni.
IKings izobhekana neJomo Cosmos kowokuhlungela ukungena kwiNedbank Cup ngeSonto ngo15h00 eVosloorus Stadium, eVosloorus.
Leli phephandaba lithole ukuthi kunabadlali ababizwe emuva kwejimu ngumqeqeshi wale kilabhu uSimo “Govuza” Dladla wabanika izincwadi ezibatshela ukuthi bayakhululwa ekilabhini.
Kuthiwa lezi zincwadi akuzange kuxoxwe nalaba badlali ngazo, bavele banikwa nje isigubhukane.
Phakathi kwabadlali okuthiwa banikwe lezi zincwadi kungabalwa uCasper Zikalala, u-Ayanda Ngcongo, uBafana Dlamini, uS’boniso Ntshangase, Thato Sefoli noPapy Faty.
UVukile Mngqibisi kuthiwa kade zaqala izingxoxo naye zokuba kunqanyulwe inkontileka yakhe.
Kuthiwa le kilabhu ayikaqedi ukugaxa izembe njengoba kuthiwa kunabanye abadlali abasendleleni.
Leli phephandaba lithole ukuthi izolo ngoLwesithathu emini yantambama abanye balaba badlali abanikwe lezi zincwadi bebenomhlangano nenhlangano elwa nokuxhashazwa kwabadlali kuleli iSouth African Football Players Union (Safpu) okuthiwa iyona esisingethe udaba ngenhloso yokuthi kwenziwe ubulungiswa.
Kuthiwa laba badlali abanankinga nokuthi ikilabhu ayisabadingi kodwa bafuna ukuba kuboniswane ngezinyanga abafuna ukuziholelwa abayingeni eyezinyanga ezimbili okuthiwa zibhalwe kulezi zincwadi.
UMlungiseni “Gigi” Masinga weSafpu ukuqinisekisile ukuthi uhlangane nabadlali abathathu beKings izolo ngoLwesithathu okunguNtshangase, Zikalala noNgcongo.
“Sihlela ukuhlangana nabaphathi beKings kungekudala kuxoxwe ukuze kuhlukwane kahle wonke umuntu ejabulile.
Engifuna ukukucacisa wukuthi akuliwa siyoxoxa ngoba kukhona abadlali abangagculisekile ngakho.
Okuhle wukuthi iKings kuyakhulumeka nayo ngethemba ukuthi sizovumelana kahle. Kodwa uma kungukuthi asivumelani kuzophoqeleka ukuthi siluqhube udaba ngoba ekugcineni silwela abadlali,” kusho uMasinga.