ITULO LOKUKETULA UMQEQESHI WE-CHIEFS
URama nesicelo kubalandeli beChiefs
ILAMONTVILLE Golden Arrows engenye yamakilabhu athwele amathemba eKwaZulu Natal kwi-Absa Premiership ihlela itulo lokuqhatha uGiovanni Solinas ongumqeqeshi weKaizer Chiefs nabalandeli bale kilabhu njengoba evele esenuka iqaqa kubona.
I-Arrows izobhekana neChiefs kowe-Absa Premiership ngoMgqibelo ngo-18h00 ePrincess Magogo Stadium, KwaMashu.
Lo mdlalo yiwona omkhulu kulesi sifundazwe ngale mpelasonto njengoba kulindeleke uhehe izinkumbi zabalandeli.
Nokho la makilabhu atholana nje, izinto aziwahambeli kahle njengoba iwini ingabakhwekazi kuwona.
UNduduzo “Sulu” Sibiya odlala esiswini kwi-Arrows uthi yiwona mdlalo abazovuka ngawo lona.
Uthi noma kanjani beza netulo elizoqhatha uSolinas nabalandeli beChiefs.
“Isimo asisihambeli kahle, imiphumela ayikasivumi, kodwa-ke umunwe kufanele siwubhekise kithina ngoba siyahluleka wukuvalela amathuba esiwatholayo.
"Kodwa leli khefu leFifa ebesinalo lisisizile ukuzicija lapho ebesibuthuntu khona.
"Noma kanjani lo mdlalo sizowunqoba, siyibophela elibi itulo iChiefs elizoqhatha umqeqeshi wayo nabalandeli bayo.
"Siyithole kahle isimo sayo sibheda njengoba kwenzeke ngesizini eyedlule zinjena izinto zayo, sagcina siyihlule ngo-3-1 sisekhaya.
"Ngisishayela ihlombe isinqumo sabaphathi sokuthi bangawususi umdlalo wethu KwaMashu, sibadinga kulona leli kopi lethu le nkundla,” kusho uSibiya.
Uthi abakhali ngalutho, iqembu labo libukeka liqinile njengoba kubuye noDivine Lungu odlala emuva obelimele.
URamahlwe “Rama” Mphahlele odlala emuva kwiChiefs uthi bazowaphendula amatafula kulo mdlalo.
“Yiwona mdlalo lona okufanele sibuyise ngawo ukuzethemba ngoba sesiphoxe kakhulu.
"Ngifuna ukusho kubalandeli bethu ukuthi asenzi ngamabomu, yisimo esingakavumi kodwa izinto zisazolunga.
"Sicela baqhubeke nokuseseka ngoba impilo injalo nje ukujabula kuyashintshana.
"Siyeza esethu isikhathi laba abajabule manje yibona abazobe bekhala uma sekufike esethu isikhathi,” kusho uMphahlele.