Iphoyisa lidinwe labhubhisa ngenhlamvu
"Livulele inhlamvu leqiwe yintukuthelo"
LEQIWE yintukuthelo lafayela ngenhlamvu, kwashona abesilisa ababili abebesemcimbini wakubo ngeSonto ebusuku iphoyisa lakwaNgobese, KwaMnqobokazi, eHluhluwe.
Kuthiwa leli phoyisa, esingeke silidalule lize livele enkantolo lisho ukuthi liyalivuma noma cha icala, elingaphansi kweTactical Reponse Team( TRT), eManguzi, licasulwe wukuthi uMnu Mthembeni Zikhali, uMnu Meyi Nsele nabanye ababili, balithukile ngesikhathi libaxosha emzini wakubo.
Ngokusho komthombo weLANGA, uMnu Nsele noMnu Zikhali babambe intombazane yakhona kwaNgobese iphoyisa lathi mabahambe ngoba sebebamba amantombazane.
"Libaxoshile iphoyisa kwathi sebengaphandle, balithuka, okuyilapho lifohle khona ocingweni labalandela, ladedela inhlamvu,” kusho umthombo.
Ngokuthola kweLANGA, abanye ababili baphuthunyiswe esibhedlela bedubuleke kanzima. UMnu Vusi Nsele oyilungu lomndeni, uthi umfowabo ubengesiyona ngisho ingxenye yalaba abebexoshwe kwaNgobese, ubezidlulela, wazithela kulesi sigameko.
“Ubehamba ngemoto wabe esebona laba bafana wayimisa, waphuma ethi uyachama uxoxa nabo, kanti iphoyisa leli selizoqhamuka ngemuva, lidedele inhlamvu, washayeka kanjalo,” kusho uMnu Nsele.
UMnu Themba Zikhali onguyise omdala kaMthembeni - okuvela ukuthi ubenguthisha - uthi kunzima ukwamukela okubehlele.
“Iphoyisa leli libabulale lase liyobika lona kuqala emaphoyiseni lathi belihlaselwa, kodwa kazikho ngisho izinhlamvu ezikhombisa ukuhlaselwa kwalo,” kusho uMnu Zikhali.
UMnu Sgedegede Ngobese oyilungu lomndeni womsolwa, obekunomcimbi kuwona, akavumanga ukuphawula ngalolu daba ngesikhathi intatheli ikhuluma naye.
Okhulumela amaphoyisa KwaZuluNatal, uLt Colonel Thulani Zwane, uthi uboshiwe umsolwa esiteshini samaphoyisa eHluhluwe. “Uboshelwe icala lokubulala nelokuzama ukubulala, uzovela eNkantolo yeMantshi eHluhluwe namhlanje ngoLwesine,” kusho uLt Col Zwane.
Imizamo yokuthola uMnu Moses Dlamini we-Independent Police Investigative Directorate, iphunzile njengoba ucingo lwakhe belukhala lungabanjwa.