ULERATO "UKLINYWE YIBHUNU"
UMETHULI zinhlelo ongaconsi kubalandeli bakhe, uLerato Kganyago, uveze ukuthi uhlaselwe ngowesilisa ngosuku olwandulela uKhisimusi esitolo sakwaPick ‘n Pay, eFeatherbrook Village, eGoli.
Le ntokazi eyethula uhlelo iThe Drive, kwiMetro FM, noDineo Ranaka, yethula nohlelo lwemfashini iProject Runway South Africa. ULerato ukhulume ngalesi sigameko kwiTwitter, lapho eveze khona ukuthi uklinywe ngowesilisa oyiBhunu, kwathi inkosikazi yakhe yathuka umsizi wakhe wasendlini yambiza ngekhafula.
"Kade ngiklinywa ngowesilisa oyiBhunu engingazange ngimsukele futhi engingashongo lutho kuyena. Kuyangethusa ukuthi kusenabantu abakwazi ukwenza isenzo esinjena. Lo mlisa ubeke izandla zakhe emqaleni wami wangiklinya kubuka abantu.
"Ngifuna isitolo okwenzeke kusona lesi sigameko singinike i- video, ngidinga lona wesilisa eboshiwe,” kusho uLerato.
AbakwaPick’n Pay baphendulile kulesi sikhalo sikaLerato kuyona le nkundla, bathi bazoluphenya lolu daba. ULerato utshele abalandeli bakhe ukuthi useyibonile i- video, nabesitolo sebevumile ukuyidlulisela emaphoyiseni.
“Lokhu okwenzeke kimina namuhla kakukho mayelana nami, kepha kumayelana nalabo abahlale bebhekene nezimo ezinjengalesi bengakwazi ukuzilwela, bazibone bengenawo amandla.
"Ngiyaxolisa ku-Ester (umsizi wakhe wasendlini), nabaningi okudicilelwa phansi izithunzi zabo bengakwazi ukuzikhulumela,” kusho yena. Le ntokazi ephinde ibe nguDJ, isanda kumenyezelwa njengomethuli wesizini yesibili yeProject Runway South Africa. Abalandeli bayo bayayeseka.