IZINDUNA AZIHOLILE NAMANJE
ZIBE noKhisimusi omnyama izinduna ezingaphansi kobukhosi bakwaHlongwa, eMzumbe, ngaphansi kweNkosi Misisizwe Khawula njengoba zithi sekuphele izinyanga ezintathu zingaholi.
Zithi zibe namaholide amabi njengoba bezilokhu zilinde amaholo azo eMnyangweni wezokuBusa ngokuBambisana nezoMdabu KwaZulu-Natal kodwa kuze kwashaya uKhisimusi engabonwa.
Zitshele ILANGA ukuthi phambilini ibingakaze ibekhona into enje, bezijwayele ukuhola zinyanga zonke ngaphandle kwezihibe.
Ekhuluma neLANGA uMnu Sipho Zama, oyinduna yesizwe ngaphansi kwaKwaQoloqolo, uthe kuqale ukuba nezinxushunxushu ngoMfumfu (October), ngemuva kokuba abalo mnyango oholwa nguNkk Nomusa DubeNcube bethe kukhona okufanele kusayinwe yinkosi esanda kubekwa.
“Inkosi isisayinile wonke amaphepha obekumele iwasayine, ahamba kodwa okusixakile wukuthi siwatholile ama- payslip ngaleyo nyanga (Mfumfu), kodwa imiholo yangangena, kwathiwa amaphepha asayiniwe, imali seyifaki- we sizoyithola ngenyanga elandelayo (Lwezi) mhla ka-16,” kusho uMnu Zama.
Uthi kuze kwayophela uLwezi bengayitholile, bazitshela ukuthi bazohola ngoZibandlela (December) kodwa kwaze kwashaya uKhisimusi ingangenile.
“Sesigqigqe saze sakhathala, kayikho incazelo ecacile ukuthi yini manje ebambile ngoba ama- payslip alezi zinyanga (ezintathu) siwatholile,” kusho yena.
UMnu Dumisani Gumede, naye oyinduna ngaphansi kwayo inkosi yakwaKhawula, uthi ukungaholi kwabo izinyanga ezintathu kubafaka ingcindezi ngoba bagcina besezikweletini, abanye abagcina bengakwazi ukuzikhokhela.
“Ngaphandle nje kokuba noKhisimusi omnyama, kuphinde kube nengcindezi yokuthi kuzovulwa izikole maduze nje. Nabantu basezitolo okumele babambe imali yabo kithina, kabayitholi, sizogcina sibonakala njengezigebengu. Siyacela lo mnyango ulusukumelele phezulu udaba lwethu,” kusho uMnu Gumede.
Okhulumela umnyango, uMnu Lennox Mabaso, uthe njengomnyango bazolusukumela lolu daba babheke ukuthi kwenzekeni ngoba kakujwayelekile ukuba nesikhathi lapho izinduna zike zingaholi khona.
“Esifundazweni sinezinduna eziwu-3 000, zonke futhi ziyahola. Udaba lwalezi esikhuluma ngazo manje sizolulandelela, sithole ukuthi kwenzekeni bese silulungisa ngokukhulu ukushesha,” kusho yena.
nonhlakaniphos@ilanganews. co.za
thandeka. ngobese@ ilanganews. co.za