Sebekulungele ukuyoqwala iNhlangakazi
Kuzokhuphuka kuqala abaseKuphakameni
KONKE sekumi ngomumo ngohambo lwamaNazaretha lwaminyaka yonke olubheke eNtabeni iNhlangakazi naseKhenana, eNdwedwe.
Yize nakulo nyaka bubekhona ubuhixihixi mayelana nokuthi yiluphi uhlangothi oluzokhuphuka kuqala olwaseKuphakameni, oluholwa yiNkosi Vukile Shembe, nolwaseGinyezinye lweNkosi Mudliwamafa Shembe, kodwa akusekho ukujikela emuva kwendlu njengoba iNkantolo eNkulu yaseThekwini ikhiphe umyalelo ngoLwezi (November) wokuba abaseKuphakameni bahambe kuqala.
AbaseGinyezinye bebefuna kuhambe bona kuqala kodwa abaseKuphakameni beshaya phansi ngonyawo, befuna kukhuphuke bona kuqala njengokujwayelekile.
Ngokuthola kweLANGA, lolu daba lube selubekelwa uNhlaba (May), wangonyaka ozayo ukuba luhlale eNkantolo eNkulu yaseThekwini.
UMnu Thetha Ngiba waseKuphakameni, ekhuluma naleli phephandaba, ukuqinisekisile ukuthi yibona abazokhuphuka kuqala mhla ka-2 kuMasingana (January) behle mhla ka-9, balandelwe ngabaseThembezinhle abazokwehla mhla ka-15 bese kugcina abaseGinyezinye abazokwehla mhla ka-23.
Uhlangothi lwaseBuhleni, lweNkosi Mduduzi “Nyazilwezulu” Shembe, olushiye iNhlangakazi eminyakeni ebalelwa kwewu-5 edlule - ngenxa yayo belu imibango evamile kuleli bandla - lwathola ikhaya elisha eKhenana, oZwathini, lona luhamba mhla ka-3.
Ethintwa uMnu Joseph Mhlongo waseGinyezinye, uthe bona kabalwi nokuthi ngubani okhuphuka kuqala kodwa abakufunayo wukuthi izinhlangothi zinyuke iNhlangakazi ngokushintshana unyaka nonyaka - kungabi wuhlangothi olulodwa olunyuka kuqala minyaka yonke. Uvumile ukuthi ikhona incwadi yasenkantolo ephumile, kodwa lokho akusho ukuthi lesi sekuyisinqumo esiwujuqu.
“Lokhu asikwenzi ngoba kukhona esixabana naye kodwa sifuna nathi ukuthi siye entabeni sibaningi, bonke abantu besesemaholidini. AbaseKuphakameni bona baya kuqala ngesikhathi zonke izingane zisavalile ezikoleni, thina uma sesinyuka, izingane zisuke sezivulile okwenza sigcine siya sibancane. Ngakho sithi bonke abantu mabalithole leli thuba lokukhuphuka kuqala bonke abantu beseholidini,” kusho yena.
Mayelana nezinhlelo zabo zokwenyuka, uthe konke sekumi ngomumo, wathi lolu daba lusazoxoxwa ngoNdasa (April) wangonyaka ozayo. Ukunyukwa kweNhlangakazi ngaphandle kwezihibe kugcine ibandla lamaNazaretha lisahlangene ngaphansi kweNkosi Galilee “iLanga” Shembe.
Emuva kwalokho ibandla lihlukane kabili, kwaba khona uhlangothi lwaseBuhleni lweNkosi Amos “iNyangayezulu” Shembe, umfowabo weLanga, nolwaseKuphakameni lweNkosi Londa “Phasha” Shembe, indodana yeLanga.
Emuva kokukhothama kweNkosi Vimbeni Shembe, ezalwa yiNyangayezulu, kuqembuke uhlangothi lwaseThembezinhle obeluholwa yiNkosi Vela “Misebeyelanga‚” Shembe, edlule emhlabeni ngonyaka odlule izintambo zathathwa yiNkosi Phinda Shembe. Bobabili laba baholi bazalwa yiLanga.
OlwaseGinyezinye lweNkosi Mudliwamafa, ezalwa ngomfowabo weNkosi Londa, uNkanyezi, sekunesikhathi lukhona. Kukhona nohlangothi olwaziwa ngolwaseGoli, lweNkosi Phakama Shembe.
Nathi sifuna ukuya entabeni sibaningi, abantu beseseholidini.