UDHLOMO UKHALE NGEZINGA LOKUKHULELWA KWENTSHA
UKHALE ngezinga eliphezulu lokukhulelwa kwamantombazane asemancane uNgqongqoshe wezeMpilo KwaZulu-Natal, uDkt Sibongiseni Dhlomo, ngesikhathi kujatshulelwa izingane ezizalwe ngoKhisimusi ezibhedlela ezahlukene ngoLwesibili.
Esitatimendeni esikhishwe wumnyango wezempilo, ungqongqoshe unxenxe imiphakathi ukuba ingenelele, yenze okuthile ngalokhu, iphinde igqugquzele amantombazane amancane ukuba ahlele ukuze angeke akhulelwe.
UDkt Dhlomo uhambele isibhedlela iPrince Mshiyeni Memorial, eMlazi neRK Khan eChatsworth ehambisana noNgqongqoshe wezaseKhaya, uMnu Siyabonga Cwele, iMeya yeTheku, uNkk Zandile Gumede, neNhloko yoMnyango wezeMpilo KwaZuluNatal, uDkt Musa Gumede.
Bamukele izingane eziwu-106 okungabafana abawu-62 namantombazane awu-43. Izingane kaKhisimusi zokuqala zizalwe ezintathakusa ngoLwesibili ePrince Mshiyeni naseNorthdale eMgungundlovu kanti umama omncane othole ingane yomfana uneminya- ka ewu-16, yena ubelethele esibhedlela iQueen Nandi Memorial, Empangeni.
Kunomama ababili abaneminyaka ewu-17, oyedwa wabo ubelethele ePrince Mshiyeni, omunye eSt Apollinaris, eHarry Gwala. Isibhedlela saseShowe sona samukele amawele, okungumfana nentombazane.
“Siwumnyango kuyasikhathaza ukukhulelwa kwamantombazane asemancane kanti siphezulu isibalo somama abancane abashona bebeletha ngoba iminyaka yabo isuke ingakulungele ukuba ngomama. Okuphinde kusikhathaze kakhulu wukuthi amanye amantombazane asaba ukuya esibhedlela kusenesikhathi, aphinde afihle izisu kuze kuhambe isikhathi eside.
“Siwumnyango sinxenxa amantombazane asemancane aseqalile ukwenza ucansi ukuba azivikele ngokuhlela ukuze angeke asheshe akhulelwe. Siyajabula ukuthi cishe zonke izibhedlela kulesi sifundazwe zinamahhovisi omnyango wezasekhaya.
“Omama abazobeletha kungakuhle baphathe omazisi babo ukuze bezokwazi ukwenzela izingane izitifiketi,” kusho uDkt Dhlomo.
UNgqongqoshe Cwele ubonge uMnyango wezeMpilo KwaZuluNatal noMasipala weTheku ngokusebenza ngokubambisana ukuqinisekisa ukuthi ukubhaliswa kwezitifiketi zezingane ezizelwe kuyimpumelelo.
“Siyabujabulela ubudlelwano esinabo nomnyango wezempilo ukuthi onina bezingane ezizelwe bakwazi ukwenza izitifiketi zokuzalwa ezibhedlela. Kubalulekile ukuba izingane zibe nezitifiketi zokuzalwa ngoba lokhu kwenza impilo ibe lula uma ingane sekumele iyongena esikoleni,” kusho uMnu Cwele esisatimendeni.