BELIPHEZULU IZINGA KUMASKANDI
UNYAKAZISE inkundla uBukelani “Dlubheke” Khuzwayo kwiBuyelakhaya Masikandi Festival, eKing Edward Park, eGreytown, ngoMgqibelo.
Ukungena kwakhe kushintshe isimo emcimbini, kwathokozelwa kakhulu ingoma yakhe entsha ethi: "Ingqongqo” ekhishwe yaqondana nalesi sikhathi samaholide.
Nakuba imvula ibizama ukuphazamisa umcimbi emini, kodwa abathandi bomculo wesintu balindile kwaze kwaba sebusuku. Uze wagoqwa umcimbi bengashiyanga phansi njengoba kade liwisa namatshe.
Indlela obekufakwa ngayo abaculi esiteji, bekungabukwa izinga lomculi ngoba nabasazabalaza bebefakwa phakathi kwezinkunzi ezihlonishwayo, kababhuliswanga amazolo.
Umhleli womcimbi, uMnu Sipho “Geh” Ngcobo, uthe imicimbi yakhe ngeyokunikeza ithuba abaculi abavalelekayo kweminye emikhulu kamasikandi.
Lo mcimbi kuthiwe usuzokwe- nzeka minyaka yonke ngenhloso yokuba abantu basezindaweni zasemakhaya nabo bathole ithuba lokuxhumana namaciko abahlale bezwa ngawo emisakazweni, befunda ngawo nasemaphepheni.
Ubuhleleke ngokwezinga eliphezulu kakhulu, kanti nabantu bebeziphethe kahle. Amaciko kawazange akhulume izinkulumo ezimbi esiteji okungenye yezinto evame ukunyomfa umcimbi.
Afikile amaciko ashiyelana inkundla okubalwa kuwona uKhangelani, iGcokama Elisha, uJaiva Zimnike, uNgiga, Imithente, uMajotha, uBuselaphi, uSgabiso, Inkosi Yamagcokama, uMfanie, Amageza Amahle, uShwi noMtekhala, uMdumazi, uNjoko, uBahubhe, uQhosha, Abafana bakaMgqumeni, u-Ali Mgube, uDulasi noMalahle.
Umcimbi uvalwe yiqembu Amangcukumane. ILANGA beliyingxenye yabaxhasi balo mcimbi.