Banxenxa amavoti ngomculo
Umasipala wenze idili lomculo kamasikandi ukubonga igalelo labo endaweni
KUZODABUKA imbadada kusasa ngoLwesihlanu kwingqophamlando yomcimbi wengoma ozobe ubophele amaciko asezakhele igama kumasikandi ngaphansi kukaMasipala waKwaMaphumulo ukuqhakambisa igalelo lawo ekuthatheni le ndawo ayibeka ebalazweni lomhlaba. Kulo mcimbi ozoba seSabuyaze Sport Ground, KwaMaphumulo, kuzobe kushiyelana inkundla amaciko angawokudabuka kule ndawo okubalwa kuwona u-Ali Mgube, uZanefa Ngidi, uMajotha, uMfiliseni Magubane, iNgonyama yehlathi noLihle Xhakaza. Ikhuluma naleli phephandaba iMeya yaKwaMaphumulo, uNkk Zibuyile Khuzwayo-Dlamini ( esesithombeni), ithe kuwona lo mcimbi bazophinde bahloniphe igalelo likaAaron “Maqhude” Mkhize odlala i- bass guitar. UMaqhude usezakhele igama ngekhono lakhe lokunciza intambo, edlalela omasikandi abaningi. “Kule ndawo yethu sinabaculi bakamaskandi, kodwa besingakaze sibe nomcimbi wokubabungaza, sibabonge ngokuphakamisa indawo yangakithi. Kulo mcimbi kuzobe kungenwa ngomazisi, akukhokhwa mali yokungena.
"Umuntu ufika nomazisi wakhe angene, abuke umcimbi.
"Sikwenza lokhu ngoba sifuna ukugqugquzela abantu bale ndawo ukuba babhalisele ukuvota. Kuke kwavela phambalini ezibalweni zabakwaStats SA ukuthi indawo yethu, inabantu ababalelwa ku-85 000, kodwa uma sekuvotwa, kuvota abawu-40 000.
"Ukuvota yiyona ndlela abantu bale ndawo abathola ngayo intuthuko, ngakho siyabanxenxa ukuba bakukhuthalele. Ngaphandle kokuvota, kungaba nzima ukuletha intuthuko. Ngikhuluma nje, sesakhe izindlu eziwu-2 000, sakha umgwaqo safaka namanzi nogesi ku- ward 7, 8 no-9.
"Kula masonto edlule besimatasa sivula irenki yamatekisi. Yonke le ntuthuko kasikwazi ukuyiletha emphakathini uma abantu bengavoti. Omunye wabaculi abadumile abaqhamuka kule ndawo, uZithulele "Majotha" Zungu, uthe uyakujabulela kakhulu ukuba yingxenye yalo mcimbi abawuhlelelwa wumasipala wabo.
“Ngicela abalandeli bethu baphume ngobuningi babo njengoba sizokwenza into yamehlo sibajabulisa.
"Kulo mcimbi kasilindele abalandeli bethu baKwaMaphumulo kuphela, kodwa nabakwezinye izindawo mabeze bazojabula nathi,” kubeka uMajotha wodumo lwengoma ethi: "Thulungasho". UMajotha usanda kukhipha i-albhamu ethi: "Ingonyama.