Uthisha uthi usabela impilo yakhe
Une-video kazakwabo enza ucansi nomfundi
Usevule icala emaphoyiseni uthisha waKwaZiphethe Secondary School, kwaDenge, KwaNongoma emuva kokusinda edutshulwa.
UMnu Musawenkosi Gumbi (36), ( osesithombeni), uthi akasakwazi ngisho ukuhamba ngenkululeko emphakathini emuva kwalesi sigameko.
Echaza uMnu Gumbi, uthi isono sakhe wukuzwakalisa ukungahambisani nezenzo zenkohlakalo kulesi sikole nasemahhovisi omnyango wezemfundo eZululand. Uthi okwalesi sikole kuxake kakhulu ngoba kubuye kufukanyelwe namahlazo okufanele ngabe athathelwa izinyathelo zomthetho.
Okunye akusolayo ukuthi kumdalela amazinyo abushelelezi, wukuthi kuze kube manje akafuni ukusho ukuthi wayiqopha noma wayithola kanjani i- video kathisha wakuso lesi sikole obonakala engena emqashweni womfundi oneminyaka ewu-17 ngesikhathi sokufundisa.
Lo thisha ubonakala engena emnyango eqala ukuwotawota lo mfundi bagcine bezithokozisa ngocansi, beshaya ngesudi yesele. Babonakala benza baze baqede emuva kwalokho abonge lo thisha, asho nokusho ukuthi usabuyela esikoleni uyoqhubeka nokufundisa.
UMnu Gumbi utshele ILANGA ebelimvakashele kwakhe, ukuthi usezame kaningi ukuxhumana nezikhulu zomnyango ukuba zithinte izinhlaka ezifanele ukuze zingenelele, kukhuzwe umonakalo womjolo kulesi sikole, phakathi kwabafundi nothisha.
ILANGA liwabonile amakhophi ezincwadi ezibhalelwe umqondisi womnyango eZululand, uMnu Dumsani Ndlovu, ukuba asungule uphenyo kodwa akwenzeki lutho.
“Inkinga iqale ngo-2017 ngesikhathi ngizwakalisa ukungenami ngokuthathwa kwezindaba zesikole ziyokhulunyelwa ehhovisi likamasipala (waKwaNongoma), kuze kuthathelwe khona izinqumo. Kube nokunye okuningana ebengikuveza engikholwa wukuthi akuhambi kahle.
"Ngibavezele ukuthi njengoba benolwazi lokuthi akukho emthethweni ukuthi othisha bajole nabafundi, kuzofanele bathathe izinyathelo kulokhu engizobavezela khona. Ngibakhombise le video, okuze kube yimanje akukho nokukodwa abakwenzile ukumkhuza lo thisha.
"Okulandele lapho kube wukuthi ngilalelwe unyendle ngabantu bavulela ngenhlamvu bebhekise kimi. Ngisizwe wukuphuma ngibaleke, ngishiye imoto. Kubizwe umhlangano wabazali esikoleni, usihlalo wesigungu ufike watshela abazali ukuthi ngizidubule mina ngoba ngifuna ukunakwa.
"Ngisenayo inkulumo yakhe eqoshiwe esho lawo mazwi,’’ kuchaza uMnu Gumbi. ILANGA liyizwile le nkulumo. Uthe uyavuma ukuthi uqashelwe ukuyofundisa kulesi sikole, kodwa ngeke akwazi ukuthula nezinkinga abona zenzeka esikoleni.
Ethintwa uMnu Mandlenkosi Mpanza, ongusihlalo wesigungu uvele wabhoka ngolaka maqede wabeka phansi ucingo. Usonge ngokuthathela intatheli izinyathelo zomthetho uma ike yalubhala lolu daba.
“Angifuni ukukhuluma nawe ntatheli, lo muntu okunike inombolo yami ufuna ungithuke emaphepheni. Wena qhubeka nokungethuka ugcine lapho uthanda khona, mina angizikhulumi izindaba zesikole ngamaholide.
"Lo mfana okhuluma ngaye, uyena okuthume ukuba ungifonele. Sisemaholideni kaKhisimusi, hlukana nami. Mina nginommeli wami. Kwamanje ngizohamba ngiyobika emaphoyiseni, ngikuvulele icala lokungifonela unganikwanga yimina inombolo yami,” esho evala ucingo.
Umqondisi wezemfundo eZululand, uMnu Dumsani Ndlovu, uthe akukho azokuphawula ngalolu daba ngoba akagunyaziwe ukuphawula kwabezindaba ngezinto eziphathelene nomnyango.
Okhulumela umnyango wezemfundo KwaZulu-Natal, uMnu Muzi Mahlambi, uthe kuzojutshwa ithimba eliyisipesheli elizohamba liyobheka ngezinkinga ezibikwayo kulesi sikole.
“Udaba esizoqala ngalo kuzoba ngolukathisha olale nomfundi. Emuva kwalo sibheke zonke izinkinga ezibalulwayo kulesiya sikole, bese kuthathwa izinyathelo ezifanele ukuze kuzolunga isimo sokufunda nokufundisa,” kusho uMnu Mahlambi.
Okhulumela amaphoyisa KwaZuluNatal, uLt Colonel Thulani Zwane, uthe lisaphenywa icala elivulwe nguMnu Gumbi esiteshini samaphoyisa aKwaNongoma ngemuva kokusinda edutshulwa ngabalisa ababili maqede bashaya utshani ngo-2017.
Ngilalelwe unyendle abantu bavulela ngenhlamvu bebhekise kimina.