BASOLA ILUNGU NGOKUBAQOLA IMALI YABO YESITOKOFELA
BASOLA unobhala wesitokofela sabo ngokubashaya ngemfe iphindiwe abesifazane baseBhambanana, eJozini, ababe noKhisimusi omuncu, kuthathwa u-R49 108 abese bewuqongelele unyaka wonke.
UNkk Happiness Nonhlanhla Nkonyane (59), ongunobhala walesi sitokofela, uthi uhlwithwe isikhwama ebesinale mali ngentathakusa yangoLwesine olwedlule obekufanele ihlukaniswe ngalo. Ngokuthola kweLANGA, le mali ibingafakwa ebhange, kwazise uNkk Nkonyane ubehlala ethembisa ozakwabo ukuthi uzoyigada yena.
UNkk Nkonyane utshele leli phephandaba ukuthi angakwazi ukumbona umuntu omephuce isikhwama semali. “Bengihamba ngedwa ngisendleleni eya emzini ebesizohlanganela kuwona kwehlukaniswe imali abantu bezohamba beyothengela izingane izimpahla zikaKhisimusi.
"Kuvuke umuntu wesilisa wangibuza ukuthi ngifunani lapha ngoba ngiyamphazamisa njengoba abantu besalele emakhaya. Kuthe ngingakaphenduli, wangibamba wangephuca isikhwama semali, wabaleka.
"Lokho kube wukuhamba kwemali yamakhosikazi. Kangikwazanga ukuya emaphoyiseni ngoba ngivele ngavukwa yisifo i- asthma. Ngiyazi ukuthi kukhona abasola ukuthi ngiyidlile le mali,” kusho uNkk Nkonyane onguthisha eNkulisweni Primary School. ILANGA lithintwe ngabanye besifazane abathe uzakwabo usenga ezimithiyo ngokubanjwa inkunzi.
Baveze ukuthi iningi labo kalisebenzi, bayaye bathathe ingxenye emalini yeqolo abayiholela izingane bayofaka esitokofeleni ukwenzela izingane zijabule ngoKhisimusi.
UNkk Thulisile Gumede ongumfelokazi, uthe: “Abantwana bami bangidubile ngoba bengihlala ngokubethembisa ukuthi bazodla kamnandi ngoKhisimusi futhi bazogqoka izimpahla ezintsha uma kuvulwa izikole. Ngihlala ngokubagada ngoba lona osekhulile angaze athathe isinqumo esibucayi.
"Ngize ngasizwa wukuthi kufike umfowethu wazongiduduzela zona lezi zingane. Namanje kasiyikholwa eyokuthi umemu Nkonyane ubanjwe inkunzi. Khona ubeyaphi ngabo-3 entathakusa?” UNkz Jabu Mlambo (33) uveze ukuthi namanje akayikholwa le ndaba.
“Ngihlala nezingane zakwethu, kasisenabazali. Ngikhuluma nje, ngisizwe wukuthi ikhona enye inhlangano yegilosa ebengijoyine kuyona. Ngabe kube yisililo sodwa. Umama uNkonyane wehlulekile ukwakha leli tulo lakhe ngoba thina silandele ukuloba kwesicathulo esiphume naye ekhaya silandelana nesakhe. Leso sicathulo sijikile saphelela emzini wakhe futhi sesiyazi nokuthi ngubani umnikazi waso.
"Kuyisifiso sethu ukuba umama asheshe asinike imali yethu kungakavulwa izikole ukuze sizokwazi ukuthengela izingane izimpahla zesikole ngoba usevele usifake kuKhisimusi omnyama,” kusho uNkz Mlambo. Lolu daba lubikwe enduneni yendawo, uMnu Ephraim Ndlazi.
“Ngilutholile lolu daba kodwa ngibanxuse ukuba balubike emaphoyiseni ukuze kube yiwona aqala ukuphenya,” kusho uMnu Ndlazi.
Okhulumela amaphoyisa KwaZulu-Natal, uLt Colonel Thulani Zwane, uthe kuyiphutha ukuthi namanje kalikavulwa icala ngoba yisigameko esibucayi lesi.
“Abantu sihlala sibakhuza njalo sithi mabayeke ukuhlala nemali emakhaya. Eyalesi sigameko kayizwakali kahle ngoba umama ubanjwe inkunzi ngezithuba obekufanele ngabe usesezingutsheni ngaso. Kufanele ayovula icala emaphoyiseni nengxenye yamalungu esitokofela sabo,” kusho uLt Colonel Zwane.