USEQOKWE NGOKUGCWELE UMKHUZI WAMAPHOYISA
KUGCINE kuphelile ukuqagela ngesikhundla somkhuzi wamaphoyisa KwaZuluNatal, ebesibanjwe nguLt General Nhlanhla Mkhwanazi ( osesithombeni) oseqashwe ngokugcwele.
Lokhu kumenyezelwe nguNgqongqoshe wamaPhoyisa, uMnu Bheki Cele. ULt Gen Mkhwanazi ubekade ebambile kulesi sikhundla kusuka ngoNhlaba (May) ngemuva kokuthatha izintambo kuMajor General Bheki Langa, naye obekade ebambile kulesi sikhundla.
Lesi sikhundla besiphethwe nguLt General Mmamonnye Ngobeni owesule kusona ngonyaka odlule.
ULt Gen Ngobeni ubemisiwe kulesi sikhundla iminyaka emibili ngemuva kokuqubuka kwezinsolo zokuthi uke waba nobudlelwano obusolisayo nosomabhizinisi waseThekwini, uMnu Thoshan Panday.
Wehlulekile-ke ukuba inkantolo yokwedluliswa kwamacala ukuba imbuyisele kulesi sikhundla.
UMnu Cele uthi ukubekwa kukaLt Gen Mkhwanazi kulesi sikhundla kulindeleke ukuba kudale uzinzo KwaZuluNatal. “Ziningi izinkinga esesike saba nazo kulesi sifundazwe.
"Likhulu iqhaza alibambile ekubeni izinto zibuyele esimeni kulesi sifundazwe. Sinethemba lokuthi impilo izoba ngcono kakhulu ukuqhubekela phambili," kusho uMnu Cele.
Ubekhuluma esigcawini sabezindaba ebesiseGateway Theatre of Shopping, ngemuva kokuhambela le ndawo eyihlola namaphoyisa ngoMsombuluko.
"Uyile nakwezinye izinxanxathela zezitolo ngawo uMsombuluko. ULt General Mkhwanazi uthi uzimisele ngokugxila ekwehliseni isibalo esiphezulu sababulawayo, wukugqekezwa kwemizi, nokudunwa kwezimoto okuphezulu kulesi sifundazwe.
“Lezi yizona zinto esizimisele ngokuba sigxile kuzona, ukuze izakhamizi zikwazi ukuhamba ngokukhululeka nokulala kahle ebusuku ngaphandle kokwesaba izigebengu,” kusho yena.