LUCKY CAIN

BANINGI abangeke bawukhohlwe unyaka ka-2018 kwezikamabonakude ngenxa yezigameko ezenzekile kuwo.

IMBEWU

Kukuwo lo nyaka lapho sethulelwe khona umdlalo omusha owuchungechunge Imbewu ekhonjiswa kwi-e tv phakathi nezinsuku.

Lo mdlalo ungowesibili omkhulu ukuqoshelwa eThekwini kanti nawo ubukeka wenza kahle kakhulu njengoba usanda kufinyelela esibalweni sababukeli abayizigidi ezine.

Sisekuyo Imbewu, ngeke sisishiye ngaphandle isigameko sokushiya komunye wabalingisi obeqavile, uMpumelelo Bhulose. Kuvele izindaba ezahlukene ngokushiya kwakhe njengoba eminye imithombo iveze ukuthi ukhonjwe indlela kanti eminye imibiko ithe ukuhamba kwakhe kudalwe wukungavumelani kwakhe nabakhiqizi bomdlalo ngemigomo ebibekwa nguye lo mlingisi. UZALO

Omunye umdlalo owenze kahle kulo nyaka Uzalo, nalo oluqoshelwa eThekwini, olukhonjiswa phakathi nezinsuku kwi-SABC 1. Uzalo luqophe umlando ngokuba nesibalo sababukeli abafinyelela ku-10 million esiqeshini lapho uNkunzi (Masoja Msiza) ebeshada khona nezithandwa zakhe uMaMlambo (Gugu Gumede) noMaNgcobo (Thandeka Dawn King).

Lesi siqephu sifakwe emlandweni wezikamabonakude emidlalweni ewuchungechunge. Kuwona lo mdlalo ngeke siyishiye ngaphandle indaba yokuchithwa kwabalingisi bayo abamqoka.

Kuzokhumbuleka ukuthi kusanda kuvela izindaba ezithi uNaymaps Maphalala (Mxolisi), Nokuthula Mabika (Thobile) noGlen Gabela (Pastor Mdletshe) ngeke besaba yingxenye yalo mdlalo uma kuphela le sizini.

INTANDOKAZI yomlingisi uThembsie Matu olingisa indawo kaPetronella emdlalweni owuchungechunge i-The Queen uqhubekile nokuba wumlingisi oyintandokazi waphinde wenza ezibukwayo emcimbini we-Viewers Choice Awards njengoba egoduke nezindondo ezisemqoka eyeBest Actress neyeViewers Choice Award.

Lo mlingisi kubukeka ebe nonyaka omuhle njengoba ngaphandle kwalezi zindondo uphinde waklonyeliswa ngeFeather Award ngaphansi komunxa weDiva Extraordinaire emcimbini we-10th Feather Awards.

IDOLS

UMNCINTISWANO womculo i-Idols SA nawo wenze kahle kakhulu njengoba uqophe owawo umlando ngokuba nesibalo samavoti ezibukeli afinyelela ku-100 million.

Lo mncintiswano okuhlabane kuwo uYanga Sobetwa uqophe umlando eNingizimu Afrika njengoba udlule zonke izinhlelo zemincintiswano zikamabonakude kuleli.

KUNINGI nokunye okuthokozise abathandi bezikamabonakude njengoba kwande nemidlalo evutshelwe kuleli.