Amaphoyisa omgwaqo mawenze umsebenzi
KUYADABUKISA ukuthi kulesi sikhathi sonyaka sokujabula, lapho iningi labantu livakashela izihlobo nemindeni yalo ezindaweni ezahlukene zezwe, kubuye futhi kube yisikhathi sosizi, lapho abanye bethu belahlekelwa khona ngabathandiweyo babo ezingozini ezingenasidingo zomgwaqo.
Uma sibheka isikhathi kusukela lulunye kuZibandlela (December) kuze kufike mhla ziwu-18 kwephezulu, isibalo sabadlule ezingozini zomgwaqo senyuke ngo-16% uma usiqhathanisa nesesikhathi esifanayo sangonyaka odlule, okuyisibalo esethusayo impela. Nakulokhu imbangela enkulu yezingozi iyefana neyangeyeminyaka eyedlule; ukugijima kwabashayeli bezimoto ngokweqile, ukushayela budedengu nokungayilandeli imithetho ebekiwe yomgwaqo.
Njengenhlalayenza, uphuzo oludakanayo, ukukhathala kwabashayeli nezimoto ezingekho esimeni esihle nakho kube nomthelela omubi ekwandeni kwezingozi. Uhlobo lwezimoto oluthintekayo kakhulu kulezi zingozi ezibikiwe ngamatekisi namaloli, kanti ngokwezifundazwe, iKwaZulu-Natal ibisahamba phambili ngesibalo sokufa kwabantu abawu-162, ilandelwa yiGauteng ngabawu-125.
Okubi ngendlela esenza ngayo izinto kuleli, wukuthi konke sikwenza ngehaba, nangendlela eyethusayo; uma nje ubheka isibalo sobugebengu nokubulawa kwabantu, sibalwa namanye amazwe anodlame olwesabekayo.
Kanjalo nxa sibheka izingozi zomgwaqo, ikakhulukazi ngezikhathi zamaholide, kudlula inqwaba yabantu emhlabeni singekho isidingo salokhu.
Kufanele kwenziwe njani nxa kunje? Ngokwemibiko yemithombo yezindaba, kuthiwa uhulumeni uhlongoza ukuqinisa umthetho nezijeziso kulabo abephula imithetho yomgwaqo. Phakathi kokunye, kuhlongozwa ukuthi bonke abantu abangabashayeli baphoqeleke ukufaka isicelo sezincwadi zokushayela njalo emuva kweminyaka eyisihlanu, ukuqinisekisa ukuthi bonke abashayeli bayayikhumbula imithetho yomgwaqo.
Yebo, kufanele umthetho uqine, kodwa inkinga ngaleli lakithi wukuthi ngisho naleyo mithetho ekhona kayilandelwa, kanti nalabo okufanele baqinisekise ukuthi iyalandelwa, okungamaphoyisa, kabenzi lutho olutheni ukuqinisekisa lokhu. Enye inkinga engavela uma lo mthetho wokushaywa kwamalayisense okushayela njalo emuva kweminyaka eyisihlanu ungaphasiswa, wukuthi kungenzeka ube nomthelela wokwandisa ukugwazisa emaphoyiseni omgwaqo, okuyinto esivele iyinkinga enkulu ezweni.
Ingwadla esibhekene nayo wukuthi kukwamachanca, impunz’ edl’ emini; abantu bazenzela umathanda, ngaphandle kokwesaba ukuthi bazojeza ngezenzo zabo.
Mhlawumbe elinye icebo elingenziwa, ukwehlisa isibalo sezingozi ezenzeka ngenxa yezimoto ezihamba ngesivinini esiphezulu wukuba zonke izimoto ezakhiwa kuleli, zakhiwe ngendlela yokuthi zingakwazi ukweqa isivinini esiwu-120km ngehora.
Okunye wukuthi kufanele amaphoyisa omgwaqo enze umsebenzi wawo ngokwethembeka nangokuzimisela, abophe abephula imithetho yomgwaqo nabaphathi bawo balwe nokwanda kokugwazisa okwenziwa ngamanye amaphoyisa omgwaqo.