IMaritzburg yeshela umqeqeshi ongayifuni
Kuvela ukuthi yeshela noTinkler noKomphela
USIHLALO weMaritzburg United uFarook “Ntshebe” Kadodia ( osesithombeni) uhlalele ethembeni lokuthi kuphele le mpelasonto eqalayo ezakhe zibe seziqede konke nomqeqeshi omusha.
IMaritzburg ivalele amaholide kaKhisimusi ingasenamqeqeshi emva kokuba ikhombe indlela uFadlu Davids.
Ibikhala ngokugqoza kwemiphumela osekuholele ekutheni le kilabhu ibambe ibhuleki emsileni we-log.
Leli phephandaba lithole ukuthi uKadodia ushela u-Adel Amrouche waseBelgium, okumanje ulolonga i-USM Alger yaseAlgeria.
Lo mqeqeshi uncengwa nje uke waphumela obala wathi akasoze ayilolonga iMaritzburg ngenxa yokuthi uKadodia uke wakhombisa ukungamhloniphi efake isicelo somsebenzi wamthembisa kodwa waqasha u-Ernst Middendorp ngaphandle kokuthi abuyele kuyena amazise ukuthi angeke esamuqasha.
Kuthiwa uKadodia uzehlisile waxoxa nalo mqeqeshi.
Nokho kuvela ukuthi abanye babaqeqeshi axoxa nabo nguSteve Komphela ongumqeqeshi weBloemfontein Celtic no-Eric Tinkler osanda kuxoshwa yiChi- ppa United.
Leli phephandaba lishayela uKadodia izolo ngoLwesithathu ekuseni ukuzwa ngalolu daba uthe: “Into engizama ukuyifuqa okwamanje wukuthi ngimemezele umqeqeshi ngale mpelasonto ngoba ikilabhu kufanele iqale amalungiselelo omzuliswano ozayo.
"Angikwazanga ukuxoxa namuntu ngoKhisimusi ngenxa yokuthi abantu bayawubungaza.
"Kodwa-ke kusukela namhlanje (Izolo ngoLwesithathu) ngizoba- mba izingxoxo nabaqeqeshi abathile ngibone ukuthi kuyenzeka yini ukuthi ngimmemezele ngale mpelasonto,” kusho uKadodia.
Limbuza ukuthi ngabe kuyiqiniso yini ukuthi uxoxa no-Amrouche, uKomphela noTinkler uthe: “Yebo kunjalo kodwa okunguyena oseqhulwini ngu-Amrouche esisamuncenga.
"Kodwa-ke yibhola leli kusengenzeka mhlawumbe sithole omunye ngaphandle kwalaba angeke ngazi,” kusho uKadodia.