UPITSO UJABULELA UKWENZA KAHLE KWAWAKULELI KWI-CAF

UMQEQESHI weMamelodi Sundowns uPitso “Jingles” Mosimane ( osesithombeni) ujatshuliswa wukwenza kahle kwamakilabhu athathwa njengamakhulu kuleli emqhudelwaneni yeCaf.

IDowns idlulele esigabeni samaqoqo emuva kokuba inenebule ngo-4-0 i-Al-Ahli Benghazi yase-Libya emlenzeni wesibili weCaf Champions League ngoMgqibelo ntambama eLucas Moripe Stadium, ePitoli.

Amagoli eDowns ashaywe ngoGaston Sirino, Jeremy Brockie, Anthony Laffor noJose Ali Meza.

Kube ngu-4-0 sekuhlanganiswe yomibili imilenze kwazise kowokuqala obesekuhambeni kube ngu-0-0.

IDowns akuyona kuphela eyenze kahle emaqenjini akuleli emqhudelwaneni yeCaf njengoba ne-Orlando Pirates idlulele esigabeni samaqoqo ihlula ngo-1-0 iLight Stars yaseNamibia koweChampions League ngoMgqibelo ntambama ekuhambeni.

Kube ngu-1-0 sekuhlanganiswe yomibili imilenze.

IChiefs yona inenebule ngo-3-0 i-Algeco Plus yaseMadagascar koweCaf Confederation Cup ngoMgqibelo ntambama ekuhambeni.

Inqobe lo mdlalo ngamagoli amabili kaPule Ekstien nelikaRyan Moon.

UPitso “Jingles” Mosimane oke wasinqoba isicoco seCaf Champions League neSundowns uthi kuyamjabulisa ukubona amakilabhu athathwa njengamakhulu kuleli enza kahle emiqhudelwaneni yeCaf.

“Le miqhudelwano yeCaf imqoka ngendlela eyisimanga asizenzeli thina kodwa senzela iqembu lethu lesizwe iBafana Bafana.

"Uma iChiefs, Pirates neSundowns benza kahle kule midlalo yeCaf kusizakala iBafana.

"Ngiyajabula ukuthi wonke la makilabhu amakhulu aselisikile iphethini kwiSundowns akubona ukubaluleka kwale midlalo yeCaf.

"Ngiyafisa ukuthi sonke sihambe ibanga elide kule midlalo, kwazi bani mhlawumbe singaqopha umlando sibhekane nePirates kowamanqamu,” kusho uMosimane.