Ufuna ukubuyisa isithunzi kwiDusi
UMbanjwa uthi usewulinde ngabomvu lo mjaho
UZIMISELE ngokubuyisa isithunzi sakhe kwiDusi Canoe Marathona yangonyaka ozayo ezokuba mhla ka-14 kuya ku-16 isukela eMgungundlovu isongwe eThekwini uThulani Mbanjwa ogcine ukunqoba lo mjaho ngo-2008 egwedla noMartin Dreyer.
Umjaho wangonyaka ozayo kuzokube kuyi-K1 (ugwedla ngawedwa).
UMbanjwa utshele abezindaba ukuthi useqalile ukuzilungiselela umjaho wangonyaka ozayo.
Uthi imvula yakamuva imjabulise kakhulu njengoba umfula uMsunduzi noMngeni ugcwele uchichima.
“Le mvula esanda kuna isisize kakhulu singabagwedli. Njengoba sezisondele izinsuku zalo mdlalo umuntu akanaso isikhathi siyaziqeqesha. Isikhathi sami ngisichitha emanzini.
“Umjaho wangonyaka ozayo sengiwulindele ngabomvu. Njengoba iminyaka ihamba nesikhathi sokuphinde nginqobe lo mjaho siyangiphelela.
"Kufanele noma kanjani ngenze kahle ngonyaka ozayo ngoba uma ngehlulekile kuzokuba nzima ukuba ngiphinde ngibuye.
"Abadlali abeza emuva kwami balikhuphule kakhulu izinga futhi basebancane, bayagijima,” kubeka uMbanjwa.
UMbanjwa oneminyaka yobudala engu-35 ungene unombolo 4 no-5 ngokwehlukana eminyakeni edlule.
Lo mjaho oba izinsuku ezintathu ngosuku lokuqala usongwa eNo. 9 bridge bese ngoLwesibili kumiwe eNanda Dam, ngolokugcina uphelela eBlue Lagoon, eThekwini.
Abanye abagwedli abamnyama ababhekiwe nguSibonelo Khwela owenza kahle kakhulu kulo mjaho yize naye engakaze awunqobe egwedla yedwa, uBanetse Nkhoesa ukubala nje abambalwa.
UKhwela ugcine ukunqoba lo mjaho ngo-2014 egwedla no-Andy Birkett kanti akekho umuntu omnyama oseke wawunqoba uma egwedla ngayedwa.