Ingwadla kumdlali ophelelwa yinkontileka
Umqeqeshi uthi akenyuse amasokisi kungenjalo uzomxosha
UBHEKENE nenkinga umdlali weKaizer Chiefs ophelelwa yinkontileka nale kilabhu njengoba kuvela ukuthi umqeqeshi wakhe umtshele eziqwini zamehlo ukuthi kuzofanele enyuse amasokisi kungenjalo ngeke ayithole inkontileka entsha.
Inkontileka kaHendrick Ekstein odlala esiswini kwiChiefs iyaphela uma kusongwa isizini.
Lo mdlali selokhu ekhushulelwe esikimini esikhulu akakayenzi into ebibhekwe kuyena.
Leli phephandaba lithole ngomthombo walo ongaphakathi kwiChiefs ukuthi u-Ernst Middendorp osanda kuqashwa njengomqeqeshi omusha weChiefs ube nomhlangano omncane nalo mdlali ngaphambi kokuba kuvalwe izinsukwana, wamtshela ukuthi kuzofanele enyuse amasokisi uma kungukuthi ufuna ukuthola inkontileka entsha.
“UMiddendorp uyayithanda indlela akhwishiza ngayo lo mfana inkinga wukuthi uyashesha ukuphelelwa ngumoya.
"Usola ukuthi kukhona abuye akwenze ngaphandle kwenkundla okuyikhona okumuphazamisayo.
"Ngaphambi kokuba abanike ikhefu lezinsukwana umtshelile ukuthi kuzofanele enyuse amasokisi kungenjalo ngeke amnike inkontileka entsha,” kusho lo mthombo.
Leli phephandaba lishayela uBobby “Bob Steak” Motaung oyimenenja-jikelele yeChiefs ngalolu daba uthe ngeke akwazi ukuphawula ngezinto zebhola ngoba basaphumule njengoba kungamaholidi. IChiefs izovula unyaka ngomdlalo onzima njengoba izobhekana neMamelodi Sundowns ngomhlaka-5 kuMasingana (January) kowe-Absa Premiership ngo-15h30 eFNB Stadium, eSoweto.