Abe-Satma bagixabeze umlingisi ngomfundaze
Uzimisele ukungena emkhakheni wezamabhizinisi
UFUNA ukwenza izifundo zezemali ukuze akwazi ukungena emkhakheni wezamabhizinisi, uBotlhale Boikanyo (17), ( osesithombeni) ozakhele igama ngo-2012 ngesikhathi ehlabana ohlelweni lukamabonakude, i-SA’s Got Talent eneminyaka ewu-12 ubudala.
Uhlabane ngo-R500 000 ngesikhathi enqoba kwiSA’s Got Talent, kanti leyo mali iyoze ihlale esandleni sakhe uma esehlanganise iminyaka ewu-18.
UBotlhale waseMahikeng, eNorth West, ungumlingisi emdlalweni iScandal!, ungumhayi zinkondlo, umbhali, umdansi kanti uthi wukungena emkhakheni wezobuciko okumgqugquzele ukuba afunde azimisele ukuze akwazi ukuqhubeka aye emabangeni aphakeme. Ubefunda eSt Stithians Girl’s College, eGoli. Ekhuluma neLANGA, uthe uyaziqhenya kakhulu ngemiphumela yakhe njengoba ethole iBachelor’s Degree no-A ababili kwiDrama nakwiseSotho. “Ngisebenze kanzima ukuze ngikwazi ukuphumelela kanti inhloso yami wukungena kwezamabhizinisi ngelinye ilanga, yingakho ngingafunanga ukuqale ngenze izifundo ezizohambisana nomkhakha wamaciko. "Ngizimisele ngokweza i-B. Comm Accounting, kodwa lokho kakusho ukuthi ngeke ngizenze izifundo ezihambisana nalo mkhakha engikuwona, wukuthi nje ngeke ngiqale ngazo,” kusho yena. Le ntokazi eqale ukuhaya izinkondlo ineminyaka ewu-6 ubudala, igqugquzelwa ngunina, uNkk Mumsy Boikanyo, ithi inesifiso sokukhula kakhulu kwezobuciko. “Ngifuna ukukhula njengomdansi nomlingisi kanti ngiyathanda nokukhula emkhakheni wezikamabonakude kodwa ngisebenze ngemuva kwama-khamera,” kusho yena. Eminyakeni ewu-5 ezayo, uthi ufisa ukuzibona ekhula njengosomabhizinisi kodwa afisa ukukwenza kakhulu, wukubuyisela emphakathini. “Ngifisa kube neqhaza engilibambayo ngibuyisele emphakathini wami ngezindlela ezahlukene,” kusho yena.
Unina uthi bayaziqhenya kakhulu ngendodakazi yabo njengoba unyaka odlule kube ngobunzima kakhulu kuyona. “Kuningi abekwenza njengoba elingisa kwiScandal aphinde futhi abe yimbongi.
"Inhlanhla enkulu abenayo wukuthi abakhiqizi beScandal! bakwehlisile ukuqopha kwakhe bashintsha ne- story line sakhe. Lokhu bekusho ukuthi uqopha uma kuvalwe izikole noma ngezimpelasonto kuphela. Ubeqhubeka-ke kodwa nokusebenza ehaya izinkondlo ezindaweni ezahlukene,” kusho uNkk Boikanyo.
Uthi njengabazali, bebefisa ukuba enze izifundo ze- drama kodwa wenqaba wathi ufuna ukwenza i-B. Comm futhi ufuna ukungena emabhizinisini. “Noma yikuphi afuna ukukwenza, sizomeseka kukhona,” kusho uNkk Boikanyo.
Njengoba uBotlhale egile izimanga kwiSA's Got Talent ngo2012, ngo-2014 ukhiphe i-albhamu ethi "Spoken Word & Music" ehlanganise umculo nezinkondlo zakhe.
Ngawo lowo nyaka, uhaye inkondlo ngesikhathi kubekwa uMnu Jacob Zuma njengomengameli waseNiningizimu Afrika ihlandla lesibili. KwiScandal! uqale ukudlala indawo ka-Omphile ngo-2015.
Unyelwe yinyoni esandleni njengoba abeSouth African Traditional Achievement Awards (Satma), beveze ukuthi bazomnika umfundaze ukuqhubeka nezifundo zakhe.
“Lokhu kuyangithobisa kakhulu ngoba imfundo iyabiza. Ngizimisele ngokuqhubeka ngisebenze ngokuzikhandla nakuwona lo nyaka,” kusho yena.