BAGXEKA UMNYANGO "NGABEHLA ISITAFU"
UZWAKALISE ukukhathazeka ngemiphumela kamatikuletsheni yango-2018, umhlaziyi wezemfundo, uMnu Nic Spaull, ikakhulukazi ngesibalo sabafundi abagcine bebhalile uma kuqhathaniswa nababhalisele ukufunda uGrade 1 ngo-2007 - okungabafundi okufanele ngabe bebeqeda isikole ngonyaka odlule.
“UNgqongqoshe wezeMfundo (eyiSisekelo), uNkk Angie Motshekga, kusamele asichazele kabanzi ngezingane eziwu-400 000 ezishiye isikole (okungekho lutho oluwubufakazi bokuthi zenzani empilweni njengamanje) ngoba kuyacaca ukuthi kazisebenzi futhi kazikho emakolishi amakhono,” kusho uMnu Spaull kuTwitter.
Usebenzise i- graph echaza ukuthi zingaphezu kuka-1 002 500 izingane ezibhalisele ukufunda uGrade 1 ngo-2007 kodwa ziwu-512 700 (51%) ezibhale umatikuletsheni nyakenye. Ziwu-400 761 (40%) eziwuphasile, kanti ziwu-172 000 (17%) ezithole ama- bachelor - okwenza zibe nethuba lokwamukelwa emanyuvesi.
Empendulweni yakhe, uMnu Elijah Mhlanga, okhulumela uMnyango wezeMfundo eyisiSekelo, naye ufake i- graph kwiTwitter echaza ukuthi umnyango uyabalandela abafundi abashiya isikole ngezindlela zawo.
Uthe ungqongqoshe akakaze alushalazele nangelilodwa ilanga udaba lwabafundi "abehla isitafu" esikoleni, ngakho-ke lokhu kusho ukuthi uMnu Spaull akuyena yedwa ophakamisa ukudlanga kwale nkinga”.
UMnu Spaull uqhube wathi ngokwezibalo, kubafundi abawu100 besifazane abenza umatikuletsheni, bawu-82 abesilisa. Isizathu esikhulu salokhu, wukuthi amantombazane enza kangcono kunabafana ezifundweni eziningi, okubenza (abafana) basheshe basiyeke isikole.
Ubhale nokuthi ezifundazweni eziningi kuye kugqugquzelwe abafundi abanezinkinga zokufunda ukuba babhalisele ukuthi umatikuletsheni wabo bazowubhala ngokwehlukana ( modularisation), ngesikhathi kubhalwa ngokuphela konyaka, bazobhala izifundo ezithile, bese kuthi ngonyaka ozayo bachibiyele ngezithile, okwenza ukuba bona bangabikhona kulesi sibalo esijatshulelwayo uma sekuphume imiphumela.
USolwazi Jonathan Jansen, wase-University of Stellenbosch, ubhale ukuthi ukuhlale ebona ungqongqoshe wezemfundo ememezela imiphumela kamatikuletsheni kufana nokuya emcimbini wosomlingo uma useyingane.
“Wena nosomlingo lowo, nisuke nazi ukuthi lokhu enikubonayo akulona iqiniso, kodwa uthule ngoba kusuke kugcwele abantu abakholelwayo emilingweni,” kusho uSolwazi Jansen.
NgoLwesine, iDA ne-EFF bathe kakukho okutheni okungajatshulelwa ngemiphumela kamatikuletsheni wanyakenye uma kukhona inqwaba yezingane ebhalisele uGrade 1 ngo-2007, kodwa engafikanga kuGrade 12.
“Kungenzeka ukuthi izingane zibhajwe kwamanye amakilasi ngoba ziyafeyila noma-ke zidukuze emswanini walolu hlelo lwemfu-ndo ye-ANC oluphuphile,” kusho uNomusa Marchesi, okhulumela iDA kwezemfundo.
Uzwakalise ukukhala ngomthelela wokubhalwa kukamatikuletsheni ube yizigaba ezimbili ( modularisation) emiphumeleni yango2018, wathi empeleni abafundi abaphasile bawu-37.6% hhayi lo 78.2% oshiwo wumnyango.